Sapaat, 10 september tassaavoq, Naalagaaffiit Peqatigiit peqqinnissakkut suleqatigiiffiata WHO-p imminortoqartarneranik akiuiniarluni suliniuteqartunut ullorititaa.
Tassunga atatillugu atuagaq qulequtserneqarsimasoq ”Inuulluarit” imminorsimasumut qanigisaasut allagaat taalliaallu atuaganngorlugu tuniniagassanngorlugulu ullormi tassani saqqummiunneqartoq, Paarisa-meersoq Bodil Karlshøj oqarpoq. Atuagarlu taanna 75 koruuninik akeqarpoq.
Imminortoqartarneranik akiuiniarluni, ukioq manna ullup malunnartinniarnerani, ulloq suliniarfik taaguuserneqarsimavoq ”Paasinnilluni neriuuteqaqqilerlunilu.”
Neriuuteqaqqilernissarlu pisariaqartinneqaqaaq.
Naatsorsuinerit kingulliit takutippaat, nunatsinni imminorsimasut agguaqatigiisillugu ukiumut 50-it missaanniittartut. Inoqassuserlu naapertorlugu, taamak amerlatigisut ukiumut imminorsimanerat ingasappoq.
Danmarkimi 5,5 millioninik inoqartumi, ukioq kingulleq inuit 628-it imminorsimapput. Imminortoqartarneranilli akiuiniarluni sulineq pitsaasumik angusaqarfiujartorpoq. 1980-kkut nalaanni Danmarkimi ukiumut imminorsimasut ukioq kingullermut naleqqiullugu marloriaammik amerlanerusimagaluarput, ukiulli tamaasa ikiliartorput.