Inuttuumasut toqutsisimasutut pasisaapput

Brasiliami kiattup orpippassuini Amazonimi indianerit arfinillit toqutsisimasutut unnerluutigineqassapput, tassa tamaani nersussuarnik paarsisumik toqutsisimasutut nerisimasutullu pasineqaramik. Nunani tamalaani nutaarsiassaqartitsiviit taama nalunaarput.
Allattoq Elisa Isaksen
februaarip 18-at 2009 08:02

Indianerit taakkua arfinillit, naggueqatigiit Kulinat ilagaat, Brasiliap kippasinnerusortaani orpippassuarmiuusut. Taakkua 21-nik ukiulimmik nersussuarmik paarsisumik toqutsisimasutut pasineqarput, oqaatigineqarluni toqoriarlugu iloqutaanik uppataatalu ilaanik nerisimasut.

Nunaannarmi nunaqarfimmi qaninnerusumeersut oqaaseqartitaata oqaatigaa, nersussuarnik paarsisup indianerit ilisarisimagai. Ullut ilaanni nersussuarnik paarsitilluni indianerit arfinillit taakkua naapissimavai, taakkualu nunaqarfimminnut nunaannarmiittumut qaaqqusimavaat. Tamatumalu kingorna angut taanna takuneqaqqissimanngilaq.

- Brasiliami inuttuumasunik siusinnerusukkut naammattoorsisoqartarpoq, kisianni ukiut qulikkaartut arlallit matuma siornatigut kingullermik taamaattumik naammattuugaqarpugut, Ivar Busatto orpippassuarni Amazonini indianernik nakkutiginnittuusoq oqarpoq.

Naggueqatigiit Kulinat allanut attaveqarpiaratik inuupput. Naggueqatigiit arnartaasa angutitaminnit allaanerulluinnartumik oqaaseqartuunerat, immikkut ilisarnaataannut ilaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq