Inuttut Pisinnaatitaaffinnut Kalaallit Nunaanni Siunnersuisoqatigiit nutaamik siulittaasortaarput siulittaasumullu tulleqalerlutik
Siunnersuisoqatigiinni maannamut siulittaasup, Hjalmar Dahlip, Inuit Issittormiut Siunnersuisoqatigiivini siulersuisussanik qinersisoqartussaanera pissutigalugu, Inuit Pisinnaatitaaffiinut Siunnersuisoqatigiinni siulittaasuujunnaarnissani qinerpaa, juulilli tungaanut siulersuisuni ilaasortaannartut inissisimanissani oqaatigalugu.
Inuit Pisinnaatitaaffiinut Kalaallit Nunaanni Siunnersuisoqatigiinni siulittaasunngortoq, Inuit Pisinnaatitaaffiinut Danmarkimi Institut-ip siulersuisuini ilaasortanngussasoq aamma aalajangerneqarpoq.
- Inuit Pisinnaatitaaffiinut Institutti ilisimasalerujussuuvoq, uagut sulinitsinni iluaqutigalugit atorluarsinnaasatsinnik, uagulli anguniagarput tassaavoq, piffissaq ungasinnerusoq isigalugu, Inuit Pisinnaatitaaffiinut Centerimik peqalernissarput, tassuunakkut ilisimasavut inuiaqatigiinni sorlanititserniassammata, siulittaasunngortoq Aaja Chemnitz Larsen oqarpoq.
Inuit Pisinnaatitaaffiinut Kalaallit Nunaata Siunnersuisoqatigiivisa, marsip 19-anni 2014-imi, ataatsimiinneranni ilanngullugit eqqartorneqarput, inuit pisinnaatitaaffii pillugit suliaqarnermi unammilligassat ersarissut, soorlu meeqqat, inuit innarluutillit, kulturi oqaatsillu, kiisalu inatsisitigut illersugaaneq eqqarsaatigalugit pisinnaatitaaffiit eqqartorneqarlutik.
