Inuttut pisinnaatitaaffiit qitiutillugit isumasioqatigiittoqarpoq
Kalaallit Nunaanni inuttut pisinnaatitaaffiit akuerineqarsimasut isumasioqatigiinnermi oqaluuserineqarput.
- Kalaallit Nunaani inuttut pisinnaatitaaffiit eqqartoraangatsigit illuatungaanit nikassarneqartussaanngilagut tamakkua piumasarigatsigit, Aqqaluk Lynge oqarpoq.
"Suliffinni kalaallisut oqalukkusukkuma, suliffinnut sullitannullu ajoqutaanngippat, taava sullunga suleqatigisama kalaallisut oqalussinnaanngitsup uparuassavaanga, unaasit ! aanani aataniluunniit oqaluutileqaa!" Aqqaluk Lynge assersuusiorluni oqarpoq. Taassuma naatsorsuutigaa assersuusiarisani ilaatigut kalaallinit eqqumaffigineqalerumaartoq, namminersorneq atuutileqqammerpoq inuttullu pisinnaatitaaffiit aatsaat eqqartoneqaleruttorput, tamannalu nutaajuvoq, tassalu ukiuni aggersuni tamanna suliassaraarput.
Jonas Christoffersen Danmarkimi inuit pisinnaatitaaffii pillugit allaffeqarfimmi pisortap isumasioqatigiinnermi maluginiarpaa, inuit taamatullu nunat inoqqaavisa pisinnaatitaaffii pillugit soqutinnittoqarluartoq oqaluuserinissaalu pisariaqartinneqartoq.
Inuit taamatutullu nunat inoqqaavisa pisinnaatitaaffiisa Kalaallit Nunaanni atuutsilernissaata pisariunera, ajornakusoornera suliassallu nutaajunera isumasioqatigiinnermi nassuerutigineqartoq, Jonas Christoffersenip maluginiarlugu oqarpoq. Tamanna aamma Danmarkimi ukiut qulit 15-illu matuma siornatigut inuit pisinnaatitaaffii pillugit suliniuteqartoqalermat misigineqarpoq. Paasissutissiissutissat annertuut pisariaqartinneqarput, ilinniartitsinerit oqallititsinerillu amerlasuut aqqusaarneqarput, inuillu pisinnaatitaaffii pillugit suut pineqarnersut paasiniarlugit.
Kalaallit Nunaanni aamma taamaaliortoqassaaq apeqquterpassuit piffissap ingerlanerani oqallisigineqassapput, nutaanillu takkuttoqartuassaaq, Namminersornerup atuutilerneratigut apeqqutit nutaat takkutissapput, suliassallu allat takkukkumaarput piffissaq ingerlanerani pisut aallaavigalugit soqutiginarsisinnaammata, Danmarkimi inuit pisinnaatitaaffii pillugit allaaffimmi pisortaq, Jonas Christoffersen Nuummi isumasioqatigiinnermi aaqqissuusseqataasoq oqarpoq.
Kalaallit Nunaanni inuttut pisinnaatitaaffiit nunallu inoqqaavisa pisinnaatitaaffii pillugit isumasioqatigiinneq Nuummi Ilimmarfimmi novembarip 23-ani 24-anilu ingerlanneqarpoq.
