Inuttut pisinnaatitaaffiit pillugit tusarniaaneq
Inuttut pisinnaatitaaffiit Kalaallit Nunatsinni qanoq isikkoqarpat? Naalakkersuisut Nunanut Allanut Ministeriaqarfik suleqatigalugu Nuummi kulturikkut illorsuarmi, Katuami, tamanut ammasumik ataasinngornermi oktobarip ulluisa 25-anni tusarniaasitsilerpata tamanna kikkulluunniit oqaaseqarfigisinnaavaat.
Nunat Naalagaaffiit Peqatigiinni ilaasortat tamarmik ukiut sisamakkaarlugit nunaminni inuit pisinnaatitaaffii pillugit inissisimanermik nalilersuisartussaapput.
Danmark, Kalaallit Nunaat Savalimmiullu ilanngullugit, siullermeerluni Naalagaaffiit Peqatigiit Inuit Pisinnaatitaaffiisa Siunnersuisoqatigiiffianni, aappaagu 2011-mi maajip ulluisa aappaanni, siullermeerluni apeqqarissaarfigineqassaaq.
Oktobarip ulluisa 25-anni tusarniaaneq Naalakkersuisut siulittaasuata, Kuupik Kleistip, ammassavaa.
Peqataasut inuit pisinnaatitaaffiisa Kalaallit Nunaanni Danmarkimullu naleqqiullugit unammillernartortaanik nalilersuinerminnik saqqummiussissapput.
Tusarniaanermi ilanngunneqartut, apeqquteqartoqassappallu apeqqutit, Naalagaaffiit Peqatigiinnut nalunaarusiamik suliaqarnermut ilanngunneqassapput.
