Inuttut ajornartorsiutit sulisut sinniisaannut saaffiginnissutigisalerpaat

Akissarsiaqarnerulernissaq sivikinnerusumillu sulisarnissaq sulisut sinniisaasa qanga suliassarikkajunnerusarpaat. Sulisulli ajornartorsiutitik sulisut sinniisaannut ullumikkut aamma suliakkiissutigisaleraat misissuinermi nutaami takuneqarsinnaalerpoq.

Københavnimi Radiometerimi sulisut sinniisaata, René Rasmussenip tamanna ilisarilluinnarpaa.

- Tamanna uanga malugereerpara. Suleqatikka namminneq inuttut ajornartorsiuteqarunik, isumaqarunillu uannit ikiorneqarsinnaallutik, ornittalernikuuvaannga.

Sulisut sinniisaat qallunaanit qanoq isigineqarnersut paasiniaaqqissaartarfik Analyse Danmark suliatigut peqatigiiffiit kattuffiata, 3F-ip misissueqqullugu qinnuigisimavaa.

Misissuinerup inernerani ilaatigut takuneqarsinnaavoq sulisut sinniisaata sulineri 65 procentit iluarisimaaraat, sulisullu quliugaangata, arfinillit, akissarsiatik, sulinngiffeqarnissartik imaluunniit sulisitsisuminnik akerleriissuteqarsimagunik sinniisortik atassuteqarfigisaraat.

Sulisulli pingasuuppata taakkunannga ataaseq nammineq ajornartorsiutini pillugit sulisut sinniisaannut aamma saaffiginnittarpoq, soorlu uisakajaarpallaarunik(stress), peqqinneq nappaatilluunniit pillugit oqaloqatiginnittarlutik.

- Tamanna takussaanerulersussaavoq, 3F-imi siulittaasup tullia, Jane Korczac, oqarpoq.

- Sulisut sinniisaasa suliaat siunissami annertusinerussagunarput, taamaattoqarnera ukiuni arlaqalersuni maluginiareerparput. Sulisummi sinniisaat nutaanik suliassaqaleriartuinnarput, sulisullu sinniisaattut qinigaasimagaanni annertunerusumik aamma piginnaatitaaffeqarnissaq piareersimaffigineqartariaqarpoq, Jane Korczac oqarpoq.

- Angerlarsimaffimmi ajornartorsiutit immaqaluunniit aningaasarsiornikkut ajornartorsiutit, allaallumi uisakajaarneq pillugit sulisut oqaloqatigiartorsinnaasarpaannga, René Rasmussen oqarpoq.

Ilanngutassiaq Danmarkip Radioanit suliarineqarpoq.