Inuttat suli sumiissusersineqanngillat

Umiarsuaq Leopard Omanip avataani Adenbugtimiitilluni piiaasunit saassunneqarpoq umiarsuarmilu inuttat aallarunneqarlutik.

Umiarsuarmi inuttat piiaasut umiarsuaanni tigusaaqqanissaat Nato-mi sakkutuunit ilimagineqarpoq.

Piiaasut umiarsuaat taanna saassussinerup nalaani ungasinngitsumiittoq aamma takuneqarsimavoq.

Umiarsuaatileqatigiiffik Shipcraft danskillu nunanut allanut ministerisaqarfiat umiarsuarmi inuttat aallarunneqarnerat pillugu tusagassiorfinnut oqaaseqarumanngillat.

Natomit paasissutissat naapertorlugit piiaasut umiarsuaat tassaavoq Taiwanimiut aalisariutaat ”Shiuh Fu No 1”. Umiarsuaq taanna 26-nik inuttaqartoq piiaasunit somaliameersunit Madagascarip avannaani decembarip qaammataani saassunneqarpoq.

Inuttat taakku 26-t qanoq innersut suli ilisimaneqanngilaq.

Paasiniaasarfik namminersortoq Risk Intelligence naapertorlugu inuttat 26-t suli umiarsuarmiinissaat ilimagineqarpoq.

- Inuttat umiarsuarmiitiinnarnissaat naliginnaasuuvoq, taamaanngippammi piiaasut sulisussaqaratillu isumaqatiginninniutissaqanngillat, paasiniaasarfimmik piginnittoq Hans Tino Hansen taama oqarpoq.

- Umiarsuarmik saassussinerup immikkukajaaq ittuunera piiaasut allatut suleriaaseqalernerannik takussutissiivoq, taamaattumik umiarsuarmi inuttat arfinillit piiaasut umiarsuaannut nuunneqarsimanissaat eqqoriaruminaappoq, Hans Tino Hansen oqarpoq.

Piiaasut aningaasanik piumasaqarsimanersut suli ilisimaneqanngilaq. Umiarsuarmik tiguaanermit ullut marluk missaat qaangiunneranni aningaasanik piumasaqartarneq naliginnaasuusoq, Hans Tino Hansenip ilanngullugu oqaatigaa.