Namminersulernissatsinnik suliniaqatigiiffik Inussuk partiinit kattufinnillu katillugit arfineq pingasunit ippassaq atsioqatigiissutigineqarluni pilersinneqarpoq. Suliniaqatigiiffik Inussuk-mik atserneqarpoq inussuk aqutissanik tikkuussisuummat, tammarnaveeqqutitullu ilisarnaataallunilu kulturitsinniimmat. Inussummik piffissami matumanerpiaq aallartitsineq pillugu, suliniaqatigiiffimmik pilersitsinissamut suleqataasoq Inatsisartuni Folketingimilu ilaasortaq, aamma namminersornerulernissatsinnik sulissutiginneqataasimasoq Lars-Emil Johansen ima oqarpoq:
- Mannakkut piffissanngorsimavoq alloriarnerup tulliata tigunissaanut. Namminersoneruleratta maajip aallaqqaataani ukiut 27-it matuma siornagut, taamani oqarpugut taanna alloriarneq siulliusoq. Maannakkullu suleqatigiikkumasut ima amerlatigilersimapput ataatsimoorlutik peqatigiiffiulernissaat tunngavissaqalersimalluni, taamaattumik manna aallartippoq.
Partiit marluk kattufiillu arfinillit atsioqatigiipput namminersulernissamut piumassuseqaramik.
- Taakkorpiaat taamatut suleqataarusunnerannut pissutaavoq inuiaqatigiinnut kalaallinut akisussaaqataasutut misigisimaneq, aammalu ingerlariaqqinnissamut piumadsaqarneq, ingerlaqqinnissamut noqasunneq.
Suleqatigiinnissap kusanartumik ingerlanneqarnissaa isumaqatigiissutillu oqaasiinnakkuussanngimmata atsioqatigiittoqartoq Lars-Emil Johansen erseqqissaavoq.
- Pisimasoq oqaluttuarisaanermut pingaaruteqarnat, taamatut inuit katersuuffianni ullormi pingaartorsiorfiusumi, sulisartut ulluanni, aammalu namminersornerulernitta atuutilerfigisimasaani ullormi atsioqatigiinnissaq pissasoq isumaqatigiisutaasimavoq.
Inuit Ataqatigiit namminersulernissatsinnik tunngaveqarluni pilersinneqartut atsioqataanngillat. Tamanna pissuteqarpoq.
- peqataanissamut aamma qaaqquneqarput, isumaqarpungalu piffissap aggersup ingerlanerani aamma ilanngukkumaartut. IA Savalimmiormiullu partiat Inussummi aamma suleqataasoq DNAG-mi suleqatigaagut taamaattumillu IA-p piffissami aggersumi ilanngunnissaa naatsorsuutigaara.
Lars-Emil Johansen aamma oqarpoq aalisartut piniartullu Kattuffiat KNAPK kiisalu Inuit Issittormiut kattuffiat ICC suleqatigiiffimmi kingusinnerusukkut ilanngunnissaat ilimagigini. Partiini Atassut Demokraatillu aamma ilaanissamut qaaqquneqarsimapput, Demokraatit naaggaarsimapput Atassullu oiareersarnermut peqataasimavoq atsioqataanermulli peqataarusussimanani.