Inuppassuit Tivoli ornigarpaat

Kalaallit Nunaat Tivolimi ullumikkut ammarneqarmat inuppassuaqarpoq ikinngutigiit ilisarisimasariillu takorniuffigalugu aammalu tusakkat kingulliit ingerlateqqinneqarlutik.

Pisussanik nalunaaruteqartartoq Carsten Siegstad tikilluaqqusereerpat nunatsinni rockertartuni tusaamasat nutaat Small Time Giants guitarit sakkortusaasikkat erinartornerillu atorlugit aliikkusiartarfissuaq nippatsippaat.

Nipinillu eqqissisimarpalunnerusunik tusarusuttut operamik erinarsortartoq Josef Josefsen Pantomimi teaterimi erinarsortoq tusarnaarpaat. Hundredet arlallit tusarnaarpaat ilaatigut Vagn Sørensen ingiortigalugu "Innarta anaanaga" erinarsoraa amerlaqisut meeraanerminniit ilikkarsimasaat.

Saqqumilaarnerit allat atisanik nuannarisalinnut ilissigaappullusooq atisaliortartut Bibi Chemnitz aamma Isaksen Designs suliaminnik saqqumilaartitsimmata. Nioqqutissanik nittarsaassiviit 15-it ukiormanna piareerneqarsimapput.

Plænenimilu tusarnaartitsisisarfissuaq inugasaassaqaaq rockimik nipilersortartut Nanook aamma Inuit Feet unnugu nipilersulerpata.

Kalaallit Nunaanni Tivoli aqagu ingerlaqqissaaq nipilersortoqarluni, saqqummersitsisoqarluni minnerunngitsumillu takummaasorpassuaqassalluni.

Aaqqissuisut naatsorsuutigaat inuit 40.000-it missaat ullumi aqagulu alakkaajumaartut.