Inuppassuit piitsunngorput
Inuit 60 millionit nunarsuarmi aningaasarsiornikkut ajalusoorneq pissutigalugu piitsunngorsimasut amerlanersaat Asiami Afrikamilu najugaqarput, aammattaarli Amerika Qiterleq annertuumik eqqugaalluni, taama oqarpoq WTO-mut pisortaq Robert Zoellick, ippassaq Mexicomiunut aningaasarpassuarnik taarsigassarsisitsineq atsiornialugu Mexicomiitilluni.
- Amerikami Qiterlermi suli piitsoqaqaaq taakkualu isertittagaat Afrikami isertinneqartartuninngarnit amerlanerulaaraluartut nunami tassani suliassaqaqaaq, Zoellick oqarpoq.
Danmarkimi nunanut siuarsarniakkanut suliniaqatigiiffimmi Mellemfolkeligt Samvirkemi generalsekretærip allanngorneq pillugu Zoellickip suut pinerai nalornisiginngilai:
- Tamanna ajunaarnersuuvoq, Franz Michael Janssen oqarpoq, taannalu isumaqarluni nunani piitsuni naasorissaasuaqqat siullerpaamik tassaasut namminneq ilaquttaminnik inuussutissaqartitsiniarnerminnik ajornartorsiuteqartut. Generalsekretæri aammattaaq isumaqarpoq allanngoriartorneq ajornerulersimasoq nunat pisuut soorlu Danmarki ajalusoornerup pinngikkallarneranut naleqqiullugu nunanut ineriartortitanut aningaasanik ikinnerusunik tunisisalersimammata.
- Tassa imaappoq nunat pisuut piitsuunerpaanut ikiuutitik ajuusaarnaraluartumik malunnartumik ikilisissimammatigik, Danmarkilu aamma taamaaliorluni, tamatumunngalu peqatigitillugu piitsuussutsip akiorniarneqarneranut aningaasaliussat siunertanut allanut atorneqartarnerat annertusiartuinnartumik takusarlugu, pingaartumik silamut tunngasunut, Franz Michael Janssen naggasiivoq.
Nunarsuarmulli tamarmut aningaaserivik qanittukkut naliliivoq inuit kaattut affaannanngortinnissaat pillugu Naalagaaffiit Peqatigiit 2015-imut anguniagai suli angumerineqarsinnaasut.
