Inuppassuit juullimi nunatsinnut inuulluaqquseqataapput

Danmarkimi kalaallit najugaqartut peqatigiiffiisa kattuffiat, Inuit aammaarluni juullimut Nunatsinnut inuulluaqqussutaat illoqarfimmi Vejle ippassaq pivoq. Ukioq manna meeqqat immikkut takutitsiffigineqartut, Kattuffiup Inuit siulittaasuata, Bitha Metelmannip oqaatigaa.
Allattoq Apollo Jeremiassen
decembarip 02-at 2012 09:19

Kalaallit Danmarkimiittut Nunatsinnut juullimut inuulluaqqusisarneri, 1978-imili pisartoq, inuppassuarnik najuuffigineqartarpoq, Vejlemi naalagiaqatigiinnermik aallartinneqartarluni, tamatumalu kingorna timersortafissuarmi orpiliaqatigiittoqartarluni, nerrinneqartarluni naggataatigullu qittanneqartarluni.

Angakkuartartoq, Aqqa Bentzen meeqqanit nuannarineqaqaluni takutitsivoq.

Bitha Metelmannip ilanngullugu oqaatigaa, ukioq manna Nunatsinnut juullimi inuulluaqqusinermut inuppassuit peqataasut 1700-t missaanniittut.

Danmarkimi kalaallit najugaqartut, Nunatsinnut juullimi inuulluaqqusisarnerat ukiut tamaasa pisartoq ilaqutariippassuarnik peqataaffigineqartarpoq persuarsiutaasarlunilu.

Unnummut qittannermi nipilersortuussapput, Danmarkimi ilinniartut nipilersortartut imminnut taasimasut Copy Paste.

Danmarkimi kalaallit najugaqartut Nunatsinnut juullimi inuulluaqqussutaat, KNR-TV-kkut juullikkunni takutinneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq