INUPLAN nunani tamalaani suleqataalerpoq

Suliffeqarfik siunnersuisarfik Nuummi angerlarsimaffeqartoq, INUPLAN nunani allaneersunik suliffeqarfissuarnik sullissisussanngorpoq. Suliffeqarfissuit Nunatta sineriaani uuliasiornermik aamma aatsitassarsiornermik pilersaaruteqartut taamaalilluni INUPLAN-imit sullinneqartussanngorput.
Allattoq Apollo Jeremiassen
decembarip 15-at 2011 17:10

Canadamiut suliffeqarfissuata, Golder Associationip INUPLAN-ip suleqatigalugu, Mæersk Oil-i avatangiisit pillugit misissuissuttussanngorpaat.

INUPLAN ukiup ataatsip matuma siornatigut million koruunit arlerlugit aningaasaliinermikkut avatangiisit pillugit immikkoortoqalerpoq, taannalu sisamanik sulisoqarpoq. Taamaaliorput nalugaluarlugu siunissami suliassaqassanerlutik.

- Nunarsuatsinni suliffeqarfissuit Nunatsinnut isiginerat eqqarsaatigalugu maannagaaq piginnaasaqassutsitsinnik takussutissaqartinnissaat pisariaqarmat suliffeqarfitsinnik alliliivugut, INUPLAN-ip pisortaa, Kristian Lennert tusagassiutinut allakkamini ilaatigut taama nalunaarpoq.

Mæersk Oil-ip Upernaviup eqqaani misissuinerminut atatillugu, 3D atorlugu immamik sajuppillatsitsilluni misissuinissaa sioqqullugu, Canadami suliffeqarfissuaq Golder Association suleqatigalugu INUPLAN avatangiisinik misissuissaaq, tamannalu pissalluni Upernaviup eqqaani nunaqarfinni Tasiusap aamma Nuussuup avataanni.

- Isumaqatigiissusiorneq taamaattoq uagutsinnut pattalaarinninneruvoq nersualaarinninnerullunilu, suliffeqarfitsinnuinnaanngitsoq aammali Kalaallit Nunaanni siunnersuisarfinnut tamanut, Kristian Lennert oqarpoq.

Taassuma naatsorsuutigaa nunani allamiunut sullissineq siunissami pitsanngoriarumaartoq aammalu avatangiisinik misissuisalernissaq eqqarsaatigalugu piginnaasaqassutsimut pitsanngoriaataassasortaaq.

INUPLAN Nunatsinneersunit 100 procentimik pigineqarpoq inuillu 30-it sulisoralugit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq