Inuplan avaqqunneqartutut misigisimavoq
Pisortat sanaartornerup iluani suliariumannittussarsiuussigaangata inatsisit malillugit suliffeqarfiit nunatsinni angerlarsimaffeqartussaasarput, pissutsinik ilisimasaqarnissaat pingaaruteqarmat.
- Nunatsinni inuussutissarsiornikkut ingerlataqassagaanni nunatsinni selskabi angerlarsimaffeqartussaavoq, taamatullu siuttui inissisimasussaassallutik. Tamanna pisimannngilaq, isumaqarpungalu Namminersornerullutik Oqartussat unioqqutitsisut.
Kristian Lennert aamma isumaqarpoq suliaq nunatsinnut sukkanerpaamik utertittariaqartoq, nunatsinni pitsaanerusumik akikinnerusumillu suliarisinnaammassuk.
- Ukiut 30-t sinnerlugit napparsimmaveqarfinnik sammisaqarnikuuvugut, taamaammat avaqqutiinnarlugu suliassap nunatta avataanut tunniunneqarnera sakkortuumik uparuarparput, oqarpoq.
Isumaqarportaaq C.F. Møllerikkut suliaq tigummiinnassappassuk ilisimasat Danmarkimut inissinneqassapput ilisimasallu Danmarkimi piorsarneqassallutik, nunatsinni piorsarneqaratik.
- Annilaangassutiginissaavarput napparsimmavissarsuup immaqa akisunerulersinnaanera, nangippoq.
Takussutissaanerarpaa Nuummi nakorsiartarfittaassap ippassigami suliariumannittussarsiuunnera.
- Aningaasat 50 procentimik sipporneqalereerput. Nakorsiartarfissaq kvadratmeterimut 36.000 koruuneqassaaq, nalinginnaasumik 20.000 koruunit missaanni akeqartussaasartoq, Kristian Lennert oqarpoq.
Suliassaq siunnersuisartunut nunaqavissunut utertittariaqarsoraa, sapinngimmassuk aamma akikinnerussammat.
- Aamma napparsimmaveqarfimmi sulisut qanimut suleqatilugit suliaq naammassineqarsinnaavoq.
Kristian Lennert, Inuplan A/S-imi piginneqataasoq nassuiaavoq.
Dronning Ingridip Napparsimmaviata nutarternera koruunit milliardit affaannik akeqassaaq ukiunilu qulini suliarineqartussaalluni. Kristian Lennertip eqqoriarpaa C.F. Møller A/S suliamik ingerlatsiinnassappat 75 millioni koruunit nunatsinninngaanniit anisussanngortut, nalinginnaammat siunnersortit sanaartornerup nalingata 20 procentiinik pisarnerat.
Illussanik titartaasartut C.F. Møller A/S-ip tusagassiuutinut nalunaarutiminni erseqqissaatigaa inatsisinik unioqqutitsisoqarsimappat, tamanna nunaqavissut suleqatigalugit namminneq aaqqiiniaqataajumaarlutik.