Inunnik isumaginninnermi siunnersortit suliassaqarpallaarput

Inunnik isumaginninnermi siunnersortit suliassat 70-it tungaanut amerlassusillit ullumikkut tigummisarpaat. Suliassallu qaleriiaaginnartillugit, iliuusissanik pilersaarusiornermi misissuinissaq naammaginarunnaartartoq, Inunnik isumaginninnermi siunnersortitut ilinniarsimasut peqatigiiffianni siulittaasup Sara Abelsen oqaatigaa.
Allattoq Oline I. Olsen
marsip 13-at 2009 10:09

Suliassallu amerlassusaasa killeqartinneqartarnissaat siunnersuutigalugu.

- Sulinitsinnut atugassarititaasunut pitsaassagaluarpoq, suliassat aalajangersimasunik amerlassusilerneqaraluarpata, soorlu assersuutigalugu meeqqanik inuusuttuaqqanillu ikiorsiisarnermi sullissisut 35-t -45-llu akornanni suliassaqartartuugaluarunik, Sara Abelsen oqarpoq.

Suliassat amerlassusilerneqarnerisigut iliuusissanik pilersaarusiornerit inunnik isumaginninnermi siunnersortinit suliarilluarneqarsinnaalissasut, meeqqat angerlarsimaffiup avataanut inissinneqartillugu iliuusissanik pilersaarutit Meeqqat illuata pisortaata amigaataasartut Radioaviisimut oqarpoq. Tamannalu inunnik isumaginninnermi siunnersortit sulinerminni maanna suliassanik 70-it sinnilinnik tigummiaqartarnerinik pissuteqartartoq, Sara Abelsen oqarpoq.

- Suliassarpassuit imaannaanngitsut oqimaatsut suliarisarpagut. Inuit angerlarsimaffiinut akulerulluta sullissisarpugut, ingammik suliat amerlatillugit, ajoraluartumik pingaartut suliassat tamakkua sukumiisumik misissornissaat naammaginarunnaartarpoq, Sara Abelsen oqarpoq. Taassumap kommunini iliuusissanik pilersaarusiortarnerit pillugit pikkorissaasarnerit amigaataanerarpai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq