Inunnguaq Hegelund iggarinnerpaanngoqqippoq
Sermitsiaq.ag-ip allaaserisaa naapertorlugu igasut sisamat Narsami naligeeqalutik iggarinneqqusaatereersullu, Inunnguaq Hegelund Nunatsinni iggarinnerpaatut toqqarneqaqqippoq.
Inunnnguaq Hegelund Nunatsinni iggarinnerpaatut toqqarneqarnerminut atatillugu Qallunaat Nunaanni igasut iggarinneqqusaatsinneqarnerannut ilaasussanngorpoq.
Nunatsinni iggarinnerpaanngortup sava mamarunartuliaralugu igasimavaa, kinguleqqiutissanillu Nunatsinneersuunik mamarunarluinnartunik sassaalliisimalluni.
Nunatsinni iggarinnerpaat tulliattut inissippoq Hotel Hans Egedemi igasoq Morgan Lundin, pingajuattut inissilluni Rune Collin Nuummi neriniartarfimmi Nipisameersoq, sisamaattullu inissilluni Nikku Mølgaard Ilulissani Hotel Arctic-imeersoq.
- Iggarinneqqusaattut naligeeqaat nerisassiaallu pitsaasorsuarnik aallaaveqarput, Esben Toftdahl Inuilimeersoq oqarpoq.
Nunatsinni iggarinneqqusaatsitsineq aqqanilissaannik ingerlanneqarpoq.
Igasunngorniaq Peter Arqe Nuummi Hotel Hans Egedemeersoq igasunngorniani iggarinnerpaatut toqqarneqarpoq.
