Inuktitut oqaatsit nukittorsarneqarput

Oqaatsit pillugit Nunavummi inatsit, oqaatsit illersorneqarnissaat pillugit naggueqatigiit Inuit inatsisaannik taaneqartoq iluaqutsiullugu, Nunavummi naalakkersuisuni, pisortaqarfinni immikkoortortaqarfinnilu, septembarimili sulinissaq periarfissaalersimavoq. Inatsit 2009-mili akuersissutigineqarmalli tamanna pilersaarusiorneqalermat, pisoq allanngornerujussuartut isigineqartariaqarpoq.

Inuksitut atuarsinnaalluni, allassinnaalluni oqalussinnaallunilu sulisinnaanissaq inatsisip kisiat ammaatinngilaa; Kalaallit Nunatsinni oqaatsit pillugit inatsit assigalugu, oqaatsinik suliffeqarfinni pikkorissartitsisoqarsinnaalissaaq, aammali Inuksitut oqalussinnaasumik qullersaqarnissamut pisinnaatitaaffik inatsimmi ilaavoq.

Oqaatsit pillugit Nunavummi pisortaq, Alexina Kublu, Radioaviisimut oqarpoq, inatsit iluaqutigalugu oqaatsit pillugit ataatsimiititaliamik pilersitsisoqareersoq. Ataatsimiititaliaq oqaatsinik nutaanik nassaarsiussaaq, atuakkat najoqqutassat, ilitsersuutit allallu pingaarutillit Inuksituumut qanittukkut nutserneqassapput, Alexina Kublu oqarpoq.

Inatsimmi aamma allassimavoq, Nunavummi kommunit tamarmik Inuksitut oqaatsit aappaagumiit atulissagaat, Nunavummiullu namminneq oqaasii atorlugit kiffartuuttalissallugit.

Meeqqat 1.klassimiit 3. klassip tungaanut Inuksitut ilinniarnissaannut angajoqqaat maannangaaq pisinnaatitaalerput. Meeqqalli atuarfiini klassit tamarmik Inuksitut atuartinneqarnissaat 2019-imiit periarfissaalissaaq.

Oqaatsit pillugit inatsisip annertuup nunavummiut tamaasa Inuktitut kukkuneqanngitsumik atuarlutillu allattalernissaannut ikiussavai. Naatsumik oqaatigalugu: oqaatsit ataavartariaqarput.