Inuk Parisimi takutinneqassaaq

Franskit kalaallit filmiliaannik nersornaaserneqarsimasumik filmertussanngorput.
Allattoq Elisa Isaksen
februaarip 22-at 2011 05:20

Parisimi filminik takutitseqattaarnermi Parisian Polar Nights film festival 2011-mi, filmi 'Inuk' tallimanngorpat februaarip 25-anni takuteqqaarneqassaaq. Filmiliortup filmiliornermilu ilitsersuisup Jean-Michel Huctins-ip, Uummannarmiunit Jens Michaelimik taaneqartartup nunaqqataanit filmi taamaalilluni takuneqarsinnaassaaq.

Filmi aliikkutassiaasoq kalaallisut oqalulluni filmiliaasoq oqaluttuamik piviusumik tunngaveqarpoq. Tassani oqaluttuarineqarluni nukappiaq 16-inik ukiulik Inuk, arnaminit imerajuttumit angutissaminillu persuttaasartumit peersinneqarluni Uummannami meeqqanut angerlarsimaffimmut nuutsinneqartoq. Tassani piniartoq Ikuma naapippaa, taassumalu puisinniaqatigalugu.

Filmi filmiliortunit 'sikumi pisunik filmiliatut' taaneqartoq, Nunatsinni siorna juunimi takuteqqaarneqarpoq. Filmi aamma ilaatigut Stockholmimi, Oslomi, Torontomi aamma New Yorkimi takutinneqareerpoq.

Filmiliornermi ilitsersuisoq Jean-Michel Huctin, tusagassiuutinut nalunaarummini allappoq, kalaallit filmimi inuttaasut filmilioqataasullu, filmi Parisimi tallimanngorpat takuteqqaarneqalerpat najuuttussaasut.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk