Inussap saarnga qangarsuarnisaq tyskinit ilisimatuunit nassaarineqarpoq, misissuinerillu takutippaat, Siberiami qaqqani Altai-ini ukiut 30.- 40.000-it matuma siorna inuusoqarsimasoq, maannamut ilisimaneqarsimanngitsunik.
Inuup sananeqaataanut ilisarnaatitut takussutissat paasinarsisippaat inuit taakku homo sapiensiusimanngitsut, tassa uatsitut siulitsitulluunniit isikkoqarsimanatik.
- Allaanerujussuusimapput, aatsaat taamaattumik naammattorsivugut, tyskeq ilisimatooq, Svante Pääbo, oqarpoq.