Inuk ataaseq Sermersuarmiit Nuuliaanneqartoq
Inuk ataaseq Sermersuarmiit marlunngornermi ullaakkut Nuuliaanneqartariaqarsimasoq, Issittumi Sakkutooqarfik paasissutissiivoq.
Allattoq Paninnguaq Steenholdt, Kenneth Elkjær
Dronning Ingridip Napparsimmavissuata napparsimasup Sermersuarmi Nuummiit 235 kilometerinik ungasitsigisumiittup aanissaanut Issittumi Sakkutooqarfik marlunngormat ikiortissarsiorfigalugu attavigaa.
Issittumi Sakkutooqarfiup qulimiguulik SAR Kangerlussuarmiit Sermersualiartipallappaa, napparsimasorlu Dronning Ingriup Napparsimmavissualiaallugu.
Napparsimmavik Issittumilu Sakkutooqarfik napparsimasoq sermersuarmut aaneqartariaqarsimasoq pillugu annerusumik oqaaseqarusunngillat.