Inuit unammiuaarnerni qitiutitaassapput

Canadamiittumi Vancouverimi 2010-mi ukiuunerani Olympiade-mik unammiuaartoqalerpat Inussuk ilisarnaatigineqassaaq.

Inussuup titartarneqarnera pisariitsunnguamik titartarneqarsimavoq, ujaqqat tallimat qaleriaakkat titartarneqarsimagamik.

Inussummilli ilisarnaatip taassuma kisimi Inuit peqataanerat malunnartissanngilaa, tassami aamma Inuit kattuffiat taaguuteqartoq: ”Inuit taperiit Canadami” komite-mik pilersitseqqammerpoq Inuit najugaqarfiiniit sisamaasuniit sinniisuutitaqartumik. Komite-p taassuma suliassaraa Olympiademik unammiuaartoqartillugu naggueqatigiit Inuit tamakkiisumik peqataatinneqartarnissaasa sulissutiginissaa, taamaalillutillu Olympiade-lerisut komite-vi piareersaasiuleraangata piareersaaqataasalertussanngorlutik. Taamaalillunilu Canadami naggueqatigiit Inuit assigiinngitsuniit sisamaniit aggerfeqartut Olympiademut peqataajuaannartalertussanngorput.

Taamatuttaaq Inuit komitep suliassarissavaa 2010-mi ukiuunerani Olympiadertoqalerpat paasissutissiisartutut sammisassaqartitsisartutullu inissisimanissani. Sammisassallu tamakku naggueqatigiit Inuit najugaanni ingerlanneqassanngillat Canadalli sinnerani ingerlanneqartussaallutik.

Olympiademi ammaanersiornersuaqalerpat Inuit peqataassapputtaaq allatigullu aamma peqataatineqassallutik. Ilaatigut Inuit eqqumiitsuliaat timersuutaallu takutinneqassapput. Eqqumiitsuliaat tuniniarneqassapput, imaanngitsorli unammiffinni tuniniarneqassasut kisiannili timmisartoqarfinni pisiniarfinnilu Canadamiittuni tamani tuniniarneqarsinnaassapput, aammattaaq qarasaasiaq aqqutigalugu eqqumiitsulianik pisisoqarsinnaassaaq.

Inussullu ilisarnaataasussaammat Inussuliat aamma tuniniarneqassasut erseqqissaatigineqarpoq.

Tamannalu pillugu Nunavummi naalakkersuisut siulittaasuat Paul Okalik tusagassiorfinnut ima oqaaseqarpoq.

- Tulluusimaarutigaarput Inussuk ilisarnaatitut ileqquliussaasussatut toqqarneqarmat.

Taassuma aamma Inussuliorlutik sanaaluttussat sanaaluttartut 1.200-t suliakkerpai, taakkulu sanaavi Canadami tamarmi tuniniarneqarsinnaassapput.

Tassuunakkut aningaasat isertitsissutaasussat pingajorarterutaat meeqqat eqqumiitsuliornermik, kulturikkut timersornikkullu ilinniartinneqarnissaannut akiliutigineqassapput.

Olympiade-lu aallartippat naggueqatigiit Inuit eqqumiitsuliaat aammattaaq saqqummersinneqaqattaartussaapput.