Inuit saarnginik nassaartut
Ilulissani Elias Jørgensenip aqqutaani assaaneq sapaatip akunnera kingulleq unitsinneqarpoq inuit saarngi siumorneqarmata. Kinguninnguali paasineqarpoq nassaat tassaasut iliveqarfitoqqamiittut nunasiaataanerup aallartilaarneraneersuugunartut.
- Illoqarfiup katersugaasiviani sulisut saarngit katersorpaat taakkulu iliveqarfimmi ilineqaqqikkumaarput, Nunatta katersugaasiviani inspektøri Mikkel Myrup KNR-mut oqarpoq.
Siornatigut erseqqissunik malittarisassaqarsimanngikkaluarpoq sanaartornermut atatillugu ilivitoqqanik nassaarnermi malinneqarsinnaasunik. Taamaammat ilaatigut ilivitoqqat qalliinnarlugit sanaartortoqartarsimavoq. Ukiorpassuillu qaangiunneranni iliveqarfitoqqat ilaat siumorneqartarput.
Taamatut nassaat ilaat kingulliit ilagaat Naalakkersuisut siulittaasuata Nuutoqqami illuata toqqaviani ilivitoqqat. Tassani paasineqarpoq ilivitoqqat qalliinnarlugit toqqaviliortoqarsimasoq.
Qaqutigoortuunngilarlu sanaartornermut atatillugu assaanerni ilivitoqqanik iliveqarfitoqqanillu nassaartoqartarnera
- Aamma siorna Ilulissani illoqarfiup ilaani allami sanaartornermut atatillugu assaanermi ilivitoqqanik siumuisoqarpoq. Taamanikkut aamma assaaneq unitsinneqarallarpoq saarngit katersorneqarneranni, Mikkel Myrup oqarpoq.
- Maanna tassa erseqqissunik malittarisassaqarpoq taama pisoqartillugu qanoq iliortoqartarnissaanik. Maanna saarngit katersoriarlugit iliveqarfimmi ileqqinneqartalerput, Mikkel Myrup nassuiaavoq.
Elias Jørgensenip aqqutaa maanna Ilulissani umiarsualiviup qulaatunginnguaniikkaluartoq nunasiaataanerup nalaani qallunaaqarfiup taanna silatinnguaniissimavoq.
