Inuit qulingiluat qilalukkanik qernertanik unioqqutitsillutik piniarsimasutut pasineqartut

Qilalukkanik qernertanik Kullorsuarmi inatsisinik unioqqititsilluni piniartoqarsimanera politiit misissuiffigileruttorpaat. Tamaanimi qernertanik pisassiissutit ukioq manna nungoreermata piniaqqusaajunnaarnikuupput.

Allattoq Mads Lynge

oktobarip 04-at 2023 17:46

Qilalukkat qernertat 20-t angullugit inatsisit unioqqutillugit Kullorsuarmi septembarimi pisarineqarsimapput, politiillu tamanna misissuiffigilerpaat, tassungalu atatillugu inuit qulingiluat pasineqarlutik.

Kalaallit Nunaannni Politiit tusagassiorfinnut taama nalunaaruteqarput.

Qilalukkat qernertat 20-t angullugit Kullorsuarmi pisarineqarsimanerat pillugu Kalaallit Nunaanni Politiit Aalisarnermut Piniarnermullu Naalakkersuisoqarfimmit septembarip ulluisa 26-anni kalerrinneqarput.

Aamma atuaruk Ujaasineq ingerlaqqippoq: Silaannakkut ujaasiunnaarluta imaatigut ujaasivugut

Inatsisit unioqqutillugit piniartoqarsimavoq, qilalukkammi qernertat ukioq manna pisassiissutigineqartut juunip ulluisa qulingiluaanni nungupput, taamalu qernertarniarneq matuneqarluni.

Upernavimmi politiit tamanna pillugu misissuilerput. Vicepolitiinspektøri Brian Thomsen, upalungaarsimasuutitat siuttuat taama oqarpoq:

- Suliamut atatillugu misissuinerit siulliit aallartereerpavut, Aalisarnermut Piniarnermullu Naalakkersuisoqarfik sinnerlugu piniarnermut nakkutilliisut, peqatigalugit, takunnissimasinnaasunik tusarniaanerit paasiniaanerillu ingerlanneqarput.

Suliamut atatillugut inuit quligilut pasineqarput, mattaallu 40 kiilu missaaniittut arsaarinnissutigineqareerput.

Pisoq qanoq annertutiginersoq, kikkut pisooqataanersut, suliami massakkut misissorneqarput,

Suliamut atatillugu paasissutissaateqartoqaruni, Kalaallit Politivinut sianerluni saaffiginnittoqarsinnaavoq, oqarasuaat: 701448

Nutaarsiassami kukkunermik nassaarsimaguit uunga allaffigineqarsinnaavugut.