Inuit pisinnaatitaaffiisa illersorneqarnissaat allaffeqarfittaassap qulakkiissavaa
Naggueqatigiit Inuit kulturiata eriagalugu atajuaannartinneqarnissaa, ilinniartitaaneq kiisalu inuit pisinnaatitaaffiisa ataqqineqarnissaat. Tassa Inuit pisinnaatitaaffii pillugit allattoqarfik nunallu inoqqaavisa pisinnaatitaaffii pillugit ilisimatusarfimmik ICC-p Nuummi pilersitsiniarnerani pingaartinneqartut.
Allattoq Mads Lynge
maajip 08-at 2009 17:51
ICC-p Kalaallit Nunaanni præsidentia Aqqaluk Lynge ima oqarpoq:
- Inuit pisinnaatitaaffii tunngaviusumik siunissami Namminersulernitsinni aamma uagut malinniagassaraavut, taamaattumik ICC-p pisortallu aqunngisaannik immikkut allaffeqarnissaa pissusissamisoorpoq. Inuit pisinnaatitaaffiisa illersorneqarnissaat Nunatsinni aamma pisinnaaniassammat. Nunap inoqqaavisa pisinnaatitaaffii siunissami Namminersorluni ingerla inatsisitigut piviusunngortinneqarsinnaanersut allaffiup qitiusumillu ingerlatsiviup ingerlatassarivai, Aqqaluk Lynge oqarpoq.
Inuit pisinnaatitaaffii pillugit allattoqarfittaassap kiisalu nunat inoqqaavisa pisinnaatitaaffii pillugit ilisimatusarfiup aappaagu ammarneqarsinnaanissaa Aqqaluk Lyngep neriuutigaa.
