Inuit Pisinnaatitaaffii pillugit Siunnersuisoqatigiit oqarasuaataat qarasaasiatigut unioqqutitsilluni iserfigineqartoq
Nunanit allaniit qarasaasiatigut isertoq Inuit Pisinnaatitaaffii pillugit Siunnersuisoqatigiit (IPPS) oqarasuaataannit unnuap qeqqata missaanniit sianeqattaarpoq.
Siunnersuisoqatigiit facebookkikkut taama allapput.
Taamaattumik unnukkut unnuakkulluunniit sianerfigineqassagaanni oqarasuaatip tiguneqannginnissaa Inuit Pisinnaatitaaffii pillugit Siunnersuisoqatigiinnit kaammattuutigineqarpoq.
-Inuit Pisinnaatitaaffii pillugit Siunnersuisoqatigiivisa oqarasuaataannit 22 95 00-imit nal. 16 aamma 08 akornanni sianerfigineqassagaluaruit, uaguunngilaq, taama allapput.
Inuit Pisinnaatitaaffii pillugit Siunnersuisoqatigiit Tusassimut attaveqarput, tassani paasitinneqarput spoofingimik taaneqartartumik pisoqartoq, tassa qarasaasiatigut isertut salloqittaallutik allamit sianertuusaarsinnaasut allatut normoqaraluarlutik.
Normumut unnukkut unnuakkulluunniit sianertoqarsinnaassanngilaq, pissutigalugu Inuit Pisinnaatitaaffii pillugit Siunnersuisoqatigiivisa normu piffissami taaneqartup iluani qaminngatimmassuk.
