Inuit pisiinnaatitaffii pillugit tusarniaaneq siulleq Kalaallit Nunaanni

Nunatsinni innutaasut kattuffiillu inuit pisinnaatitaaffii pillugit isummamminnik saqqummiussinissaminnut periarfissinneqassapput.

Naalakkersuisut Danmarkimi nunanut allanut ministereqarfik suleqatigalugu tamanut ammasumik innuttaasunik tusarniaaneq Nuummi Katuami ataasinngornermi ingerlatissavaat.

Nunat Naalagaaffinnut Peqatigiinnut ilaasortaasut, ukiut sisamakkaarlugit, nunaminni inuit pisinnaatitaaffii pillugit nalilersuisussaatitaapput.

Taamatut aaqqiineq UPR-imik, tassa Universal Periodic Review-imik taaguuteqarpoq, nunani tamalaani inuit pisinnaatitaaffiinut tunngatillugu nakkutiginninnerusoq.

Tusarniaanermit nalunaarusiassaq Danmarkip, Kalaallit Nunaat sinnerlugu Naalagaaffinnut Peqatigiinnut tunniuttussaavaa.

Nalunaarusiaq tunngavigalugu Danmark, Kalaallit Nunaat Savalimmiullu siullermeerlutik Naalagaaffinni Peqatigiinni Inuit Pisinnaatitaaffii pillugit, aappaagu maajip aappaanni naliliiffigineqartussaapput.

Tusarniaaneq ualimut nalunaaqutaq marlunut aallartissaaq kulturikkut illorsuarmi Katuami.

Naalakkersuisut siulittaasuat Kuupik Kleist tusarniaanermik aammaassaaq.

Suliniaqatigiiffik 'Meeqqat Inuunerissut' Naalagaffiit Peqatigiinni komitemik Geneve-mi ukiormanna ataatsimeeqateqarpoq, inuit pisinnaatitaaffiinut tunngatillugu Nunatsinni meeqqat atugaannut suliniutissanik siunnersuuteqarlutik.

Tusarniaaneq kikkunnut tamanut ammavoq.