Inuit pingasut hashimik anngiortumik eqqusseriarsimasutut pineqaatissinneqartut

Angut 20-t sinnerlugit ukiulik arnarlu 40-t sinnerlugit ukiulik hashimik 7 kiilumik anngiortumik eqqussuisimanermut suliami iliuuserisimasaat pissutigalugit ukiuni pingasuni qaammatinilu arfinilinni inissiisarfimmiittussanngortinneqarput.

Tamatuma saniatigut arnaq 50-it sinnerlugit ukiulik ukiunik marlunnik qaammatinilu arfinilinnik pineqaatissiissuteqarfigineqarpoq.

Tamanna Nunatta Eqqartuussisuuneqarfiani eqqartuussutip nalunaarutigineqarnerani aalajangerneqartoq, Kalaallit Nunaanni Politiit tusagassiuutinut paasissutissiissutigaat.

Pineqaatissiissut sakkortunerusoq

Nunatta Eqqartuussisuuneqarfiata aalajangernera eqqartuussiviup taakku ukiup ataatsip affaanik ukiunilu pingasuni pineqaatissiissuteqarfigineqarnissaannik aalajangerneranit sukannerneruvoq.

Eqqartuussiviup eqqartuunneqartut hashimik 3 kiilumik anngiortumik eqqussisimasutut taamani eqqartuunnikuuai, unnerluussisussaatitaasulli Nunattali Eqqartuussisuuneqarfiani inuit hashimik minnerpaamik 7 kiilumik anngiortumik eqqussuisimanerat uppernarsarpaa, taamaammat eqqartuussut sukannernerulersinneqarpoq.

- Haship annertussusaa anngiortumillu eqqussuisut aaqqissuussisimanerat tunngavigalugu psineqartut sivisunerusumik pineqaatissinneqartinniarpai. Taamaammat nunatta eqqartuussisuuneqarfiata sukannernerulersitsiniarnitsinnik malinninniarluni aalajangernera ilorrisimaarutigeqaarput, eqqartuussivimmi suliami unnerluussisussaatitaasuusoq, Martin Dahl Fuglsang oqarpoq.

Naak coronap ajornartorsiortitsinera pissutigalugu eqqartuussiviit upalungaarnermiikkaluartut eqqartuussivimmi suliaq nunatta eqqartuussisuuneqarfiani ataasinngornermi marlunngornermilu eqqartuussissutigineqarpoq.

Taamaammat ini eqqartuussiviusoq peqqinnissamut innersuussutit unioqqutinnginnissaat pissutigalugu aaqqissuunneqarsimapput.