Inuit pingasut ataqqinaammik doktorinngortinneqartut
Ilisimatuussutsikkut suliallit ataqinaammik doktorinngortut tassaapput Carl Christian Olsen (Puju), Marianne Stenbæk kiisalu Minik Rosing.
Ilisimatusarnermi suliallit pingasut sulinerminni inuiaqatigiinnut ilisimatusarnermilu pingaarutilimmik suliaqarsimanertik nersorneqaatigaat. Ilisimatusarfik tusagassiorfinnut nalunaarummi taama ilaatigut allapput.
Carl Christian Olsenip naggueqatigiit Inuit oqaasiisa attanneqarnissaannut ukiorpassuarni suliai, tamannalu pillugu ilisimatuussutsikkut suliaqarsimanini pillugu ataqqinaammik doktorinngussutigaa, soorlu aamma naggueqatigiit Inuit inuttut pisinnaatitaaffii pillugu pillugit ukiorpassuarni suliaqarsimanera nersorniarneqartoq.
- Imatut misigisimanarpoq magistertut ukiorpaalussuarni suliarisimasakka aammalu suliat assigiinngitsut tamakkua nammineq suliarisarsimasannik nersorinninneq taanna malugaara. Saniatigut aamma qujamasuutigeqaara taamaattoqarmat, pissutigalugu kalaallit ilinniarnertuut aamma taamaattunik periarfissaqartitaanerat erseqqissiartuaarmat, taanna KNR-imut oqarpoq.
Marianne Stenbæk, KNR-ip Canadamit tusagassiisartuatut ilisimaneqartoq ataqqinaammik aamma dotorinngortinneqarpoq, Kalaallit Nunaata Canadallu akornanni ilisimatuussutsikkut ataavartumik suleqatigiinnissamik pingaartitsinera, eqqumiitsuliortunillu ilisimatusartunillu attaveqalersitsinini ilaatigut nersorneqaatigalugu.
Piujuaannartitsineq pingaartillugu nunap inoqqaavisa pisinnaatitaaffii Marianne Stenbækip KNR Radiokkut tusagassiisarnermigut malunnartinniarsimagai Ilisimatusarfiup tusagassiorfinnut nalunaarummi allaaseraa.
Marianne Stenbækillu ataqqinaammik doktoringortinneqarnini tupinnanngitsumik nuannaarutigaa:
- Nuannaarutigeqaara. Kalaallit Nunaannit nersorniarneqarnertut isigaara, nunap ukiuni kingullerni 40-ni sulinini asalersimasama nersorniarmanga nuannaarutigeqaara, taanna oqarpoq.
Ujarassiooq, Minik Rosing, Københavns Universitetianeersoq, ilisimatuussutsikkullu suliaasa amerlasuut Kalaallit Nunaannut attuumassuteqartut, ataqqinaammik aamma doktorinngortinneqarpoq, soorlu Isuani ujaqqat nunarsuarmi pisoqaanersaat ilaat pillugit taassuma ilisimatusaatigisimasai ilaatigut nersorneqaatigalugit.
Minik Rosingip ataqqinaammik doktorinngortinneqarneranut atatillugu Ilisimatusarfiup tunngavilersuutaani ilaatigut allassimavoq Minik Rosingip nunarsuup ineriartornerata pisoqaanersartaanut tunngasuni pingaarutilinnik suliaqarsimanera nersorniarneqartoq. Minik Rosing ilisiatuussutsikkut sulinermini paasisanik tamanut paasineqarsinnaasunngorlugit taassuma saniatigut ingerlatitseqqiisartoq tunngavilersuutigineqarpoq.
- NUannaarutigeqaara tulluusimaarutigalugu. Suliakka Kalaallit Nunaannit nersorniarneqarnerat nuanneqaaq. Ilisimatusarfik uanga isummanni pingaaruteqarpoq, Kalaallit Nunaatami ilisimaneqarnerulernissaanut pingaaruteqarpoq, taassumalu saniatigut nunani tamalaani ilisimatuussutsikkut sulialinnut isumassarsiorfigisinnaavaat, Minik Rosing KNR-imut oqarpoq.
Ataqqinaammik doktorinngortinneqarnermi saniatigut saqqarmiumik kuultiusumik aamma tunineqarput, kuultilu nunatsinneersuulluni.
