Inuit oqaasii kalaallit oqaasii aallaavigalugit assigiissarneqaqquaat

Inuit oqaasii, kalaallit oqaasii aallaavigalugit, assigiissarneqarnissaat pimoorunniarneqalerpoq.

Naggueqatigiit Inuit akunnerminni oqaatsit atorneqartut aporfiusarnerat qatsulluinnarpaat, Canadami nutaarsiassaqartitsiviit ilaat allappoq.

Kalaallisut oqaatsinik ilisimatusarsimasoq Carl Christian Olsen ukiorpassuarni – inuit oqaasiisa oqaluttariarsornikkut allattariarsornikkullu - assigiimmik atorneqalernissaat suliniutigisimavaa.

Suliniutaa maanna Inuit Taperiit Kanatami præsidentiusimasumit Jose Kusukkamit taperserneqarpoq.

Kusugak saqqummiussinermini misigissutsit sakkortuut atorlugit inuit oqaasii issittup nunataani tamarmi Ruslandimit Alaskamut atorneqartut ataatsimut katersorneqartariaqalernerarpai, aatsaat taamaaliornikkut tammatsaaliorneqarsinnaasut unnerlugit.

- Oqaatsigut arlalitsigut assigeeqaat, sumiorpaluuteqaannarput. Taamaakkaluartoq ilaanni oqaatsit ataasiakkaat isumai pillugit isumaqatigiinngittoqarsinnaasarpoq, qanoq sumiiffinni paasineqartarnersut apeqqutaasarmat. Taamaattumik Kusugak isumaqarpoq kalaallit oqaasii aallaavigalugit inuit oqaasii ataatsimut katersorneqartariaqartut atorneqarlutillu.

Carl Christian Olseni suliniut nangillugu suleqataassaaq.

- Oqaatsit ataatsimoorussat atorneqalerpata inuit akornanni paaseqatigiinneq suli annerulissaaq.