Inuit nunaannik kaajallaanialunneq naammassivoq
Ono Fleischer-ip Karo Thomsenillu inuit nunaannik kaajallaanialunnermik arfernilissaat ippassaq naammassivaat.
- Ukiorpassuilli qaangiupput angalanerput aallartimmat taavunga Alaskamut Hudsoni kaajallallugu kiisalu Quebec-ip kujataanut qavungarsuaq avannaaniit angalasimallugu, taavalu aamma inuit kangimut killiffigisimasaat nunatta tunua maanna tassa tikissimalerparput. Kingumut qiviarluni misigisarparpassuit amerlaqaat aammalu inuit tikissimasagut naggueqaterpassuagullu ilisarisimalikkagut eqqaamanaqalutik taavalu tassa naggataarluta inuunitsinni taanna anguniarsimasarput inuit nunaat kaajallanniarlugu maanna naammassisimalerparput, taavalu aamma soorunami neriuppunga naggueqaterpassuagut atuarfipassuit isersimasagut inuillu naapeqatigisimasagut anguniakkatta siunertaanik aamma pissarsisimassasut neriuutigiuartarparput, aammalumi soorunami taamaassimassooq, Ono Fleischer oqarpoq.
Taanna aperaarput kaajallaaniaalunnermi suna siunertarineqarnersoq.
- Naggueqatigiit soorunami Ruslandi tikillugu Canada Alaskalu avannaqqullugu nunatsinnut ingerlasimapput tunumut kitaanut tassanngaanniillu Hudson Bay kaajallallugu kiisalu Quebec-i avannaa tamaat samunga Hudson Bay-ip naqqanut naggueqatigiit siassimapput taakkulu naalagaaffinni arlalinni najugaqarput imminullu tikinngisaannarput ilaallu imminnut nalullutik, uagullu ukiuni arfinilinni angalasimavugut taanna oqariartuut nassataralugu naggueqatigiinnerput oqaaseqaqatigiinnerput kultureqatigiinnerput aammalu immitsinnut susassareqatigiissinnaanerput pisariaqartikkipput. Taannalu tassa suliassaq tunngavigalugu ukiuni arfinilinni qamutini issiasimavugut persoq anorilu assorujoorlugit oqariartuuterput anngunniarlugu, Ono Fleischer oqarpoq.
Aperaarput siunissami qanoq takorluugaqarnersut.
- Tassa naammassivarput, tassa suliassaq taanna taamanersuarli aallartitarput maanna naammassivoq, kisianni oqalugiartarnigut, atuarfinnut pulaartarnigut, inunnik aamma allanik atorumaneqarutta iluaqutiginiarneqarumagutta ammavugut, uagullu aamma nammineq taamaaliortuassaagut peqqitsilluta, taanna oqariartuut ingerlattuassavarput, Ono Fleischer oqarpoq.
Ono Fleischer siullerpaamik 1975-imi angalaqqaarpoq. Ono Fleischer aamma oqarpoq atuakkiani naammassereersimagini taannalu aamma tuluttut nutserneqassanerarpaa. Naatsorsuutigaattaaq assigiinngitsunut naggueqatigiit qanoq inooriaaseqarnerat pillugu oqalugiariartortarnissartik.
