Inuit nunaanni siuttut aatsitassarsiorneq pillugu ataatsimiissapput
Qullersat ataatsimiinnissaanni, Inuit Leaders Summit-imik taaneqartussami, Issittumi aatatsitassarsiornerit avatangiisinut inooqatigiinnermullu kingunerisissaanik nalilersuisarnermi ataatsimoortumik isummertarnissaq siunertaavoq.
- ICC Namminersortoqarfinni Naalakkersuisunik qaaqqusissaaq, apeqqutit aatsitassarsiornermut tunngasut assigiinngitsut ataatsimoorluni qanoq isummerfiginiarneqarsinnaanerat tuaviortumik aaqqinniaqquneqarpoq, ICC-mi siulittaasungorlaaq Aqqaluk Lynge nassuiaavoq.
Qullersat ataatsimiinissaat sumi qaqugulu pissanersoq suli ilisimaneqanngilaq. Kisianni Nuummiit Nalunaarummi erseqqissumik allassimavoq suliassaq nukinginnartoq.
Issittup imaani siku annikilliartuinnartoq aatsitassarsiornermut periarfissiivoq. Narsap eqqaani akitsinnillu Nunatsiavumi aatsitassasiornissaq eqqarsaatigineqarpoq, urani qaqinneqartunut ilaasassalluni.
Cairn Energyp Qeqertarsuup Kitaani uuliasiorluni qillerinissaa aamma ICC-mi ataatsimeersuartut isumakulunnartoqartippaat.
Nunatsinni naalakkersuisut siulittaasuata Kuupik Kleistip ataasinngormat aammaanermi oqalugiarnermini Nunat ICC-mi ilaasortat aatsitassarsiornermi misilittagaannik ujartuivoq.
Taamaammat ICC-p iliuuseriniagaanut qilanaarpoq:
- Taamaalilluta periarfissaqassaagut, Issittumi aatsitassarsiornikkut assigiingitsutigut piumasaqaatinik minnerpaaffiliinissamik oqaluserinnissalluta. Aamma isumaqatigiissuteqarnissaq neriuutigaara. Tassami avatangiisinut tunngasumik, aningaasarsiornermut tunngasumik aammalu inuiaqatigiit illersorneqarnissaannut tunngasumik Issittumi minnnerpaaffiliisinnaagutta qujanassaqaaq.
Ataatsimeersuarnerup ingelanerani aallartitat Alaskameersut Canadameersullu EU appisaluuttarpaat. EU-p puisinit tunisassianik eqqusseqqusiunnaarniarneq aalajangiusimaannarpagu, Issittumi Siunnersuisoqatigiinni alaatsinaatsutut inissisimalernissaa ICC-p akerlilertariaqaraa oqarput.
ICC-p siulittaasua aperaarput, apeqqut taanna qanoq pissaneraa,
- Uagut isumaqarpugut, EU-p pilersaarutini tunuartittariaqaraa. Tunuartingippagu, Issittumi Siunnersuisoqatigiinni alaatsinaatsutut inissinnissaa ICC-mit akerleraarput, Aqqaluk Lynge oqarpoq.
ICC tullianik ataatsimeersuassaaq Canadami 2014-mi.
