Inuit millionilippassuit Pakistanimi angerlarsimaffeerupput

Pakistanimi qarsutsinersuaqarneratigut angerlarsimaffeeruttut oqaatigineqaraluartunit amerlanerujussuusut, Naalagaaffiit Peqatigiiit oqaatigaat.
Allattoq Elisa Isaksen
aggustip 19-at 2010 08:49

Inuit 4 millioninit amerlanerusut angerlarsimaffimminnik annaasaqartut oqaatigineqarpoq.

Taakkua Naalagaaffiit Peqatigiit ikiuiniaqatigiiffiillu oqaatigisaannit marloriaammik amerlanerupput.

Taamaalilluni Pakistanip oqaluttuarisaanerani ajunaarnersuit annersaanni, piaartumik ikiorneqarnissaminnik pisariaqariaqartitsisunut ikiuiniarnissaq aatsaat taama annertutigilerpoq.

Pakistanimiorpassuarnut ikiortariaqartunut, Naalagaaffiit Peqatigiit ikiuiniaqatigiiffiillu ikiuiniarnertik annerulersippat, nunallu tamalaat ikiuisariaqarnerannik kajumissaarlugit.

Naalagaaffiit Peqatigiit naliliinerat naapertorlugu, pilertortumik ikiorneqartariaqartunut, nerisassanut, imermik minguitsumik inissinneqarallarfissanillu pisariaqartitsisunut 3 milliardit koruunit missaat maannakkorpiaq pisariaqartinneqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq