Inuit marluk ukiup ikiuillammaatut Kalaallit Røde Korsianit toqqarneqartut
Inuit marluk ukiup ikiuillammaatut toqqarneqartut tassaapput politiassistenti Jens Thorin, Narsameersoq aamma Edvard Nielsen, Qaarsuneersoq.
Jens Thorin, sulinngiffeqarnermi nalaani tikeraarsimaarluni juulip 27-anni paasitinneqarpoq umiatsiaq inunnik arfinilinnik issimasoqarluni umiusimasoq. Edvard Nielsenillu umiatsiani politiinut taava atukkiuppaa, angutillu taakku marluk ajunaalersunik annaassiniarput.
Jens Thorinip Edvard Nielsenillu arnat utoqqasaat marluk niviarsiararlu qulingiluanik ukiulik ipisimasoq imaaniit qaqippaat, niviarsiararlu uummarsarlugu.
Nalornerianngivillutik iliuuseqaratartut
Angutit taakku marluk nalornerianngivillutik iliuuseqarasuarsimasut, ikiueqqaarnermilu pisussat pingaarnerit sisamat piviusunngortissimagaat, Ikiueqqaarnermut ataatsimiititaliami ilaasortat nalilerpaat, soorlu aamma annaassissutaasumik ikiueqqaartoqarsimaneranik naliliisoqartoq.
- Angalaqataat pingasut alianaqisumik umiiarnermi ajunaarput, annaassisoqarsimanngikkaluarpat suli umiunermi ajunaartut amerlanerusimassagaluarput, ikiueqqaartut eqqissisimallutik tamanik isiginnillutik pisimanngikkaluarpata, suliassaminnik avitseqatigiillutik, ikiuisussanik aggersaallutik tulleriissaarinerminnilu pingaarutilimmi annaassissutaasumik ikiueqqaarlutik eqqortumik tulleriiaarisimanngikkaluarpata, Kalaallit Røde Korsiat, tusagassiorfinnut nalunaarummini ilaatigut allapput.