Inuit ilaat naalakkersuisumut eqqarsalersitsivoq

Danskit aningaasaqarnermut ministeriata Thor Petersenip naalakkersuisooqatini allakkasuaatikkut siorna allaffigisimavai, inuit ilaata allakkatigut maluginiaqusimagaa naalakkersuinermi suliaqartut silaannaap allanngoriartornera pillugu ingasattajaarlutik tamatuminnga suliniutiginninnerarlugit.
septembarip 28-at 2006 16:58

Inuullu allattup allakkiamini silaannaap allanngoriartornera ikummatissallu atorneqarneri imminnut attuumassuteqanngitsut allassimavoq. Illuatungiliuttut tupigusupput, Thor Petersenili ima nassuiaavoq:

- Naalakkersuisoqatikka isummersinniarlugit allakkiamik nassiussiffigisimavakka, Thor Petersen oqarpoq.

Silaannaap allanngoriartornerata EU-mit suliniutigineqarnera pillugu Thor Petersen siusinnerusukkut danskit avatangiisinut ministereqarfimmut allagaqarpoq, taamanikkut allakkiaq isornartorsiorpaa allalluni:

- Europami silaannaap 2 gradimik kissassimanera tunngavilersuutigalugu EU-mi naalakkersuinermik suliaqartut suliniuterpassuit aningaasaliiffigimmatigik paasiuminaatseqaara.

Danmarkimi Socialdemokratit EU-mi Parlamentimi ilaasortaatitaata Dan Jørgensenip danskit aningaasaqarnermut ministeriata aningaasat qassit avatangiisit ministereqarfiata pissanerai aalajangeeqataasussaalluni taama allagaqarnera ilungersunarnerarpaa:

- George Bushimit namminissarsiornerusutut isikkoqarpoq. George Bush Thor Petersenimit ajunnginnerulluni oqarnikuuvoq silaannaap allanngoriartornera maannangaaq iliuseqarfigisariaqaripput, Dan Jørgensen taama naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq