Naggueqatigiit Inuit ilusilersugaat tujuulussualiortartunit tillinneqarsimagaluarpoq
Angakkorsuup Avap annoraarsuani 1920-mi nammineerluni ilusilersorpaa, qinngarinnitsiminit ajortumik pineqannginnissanut illersuutigissallugu.
Angakkorsuaq Ava, ilisimasassarsiortumit Nunatsinnilu aamma ilisimaneqarluiartumit, Knud Rasmussenimit assilineqarpoq aamma ullorsiummini allaaserigalugu. Tassalu taakku ullumikkut suli takuneqarsinnaapput atuarneqarsinnaallutillu.
Angakkorsuup annoraarsua amermik sanaajusoq qaqortunik kusanartunillui allapalaagaavoq, ersarilluinnarluni suna siunertarineqarnersoq, tassa imminut illersiorniarluni suliaalluni.
Taannalu annoraarsuaq atisanik ilusilersuisartunit, KTZ-imit ilaarneqarluni tujuulussuartut nioqqutigineqaleraluarpoq akisuupilussuanngorlugulu tuniniarneqaleraluarluni, tassa tuyjuulussuaq ataaseq 5.000 koruuninik akilerlugu tuniniagaaleraluarluni.
Angakkorsuup Avap Nunavummi kinguaavisa, KTZ-ip nitttartagaa takugamikku, ilusilersuisumut Kokon To Zai-mut saaffiginnipput, sooq apereqqaarneqarsimannginnersut tujuulussuup tunisassiarineqalinnginenrani.
Angakkorsuup Avap ernutaqqiutaata, Salome Awa-p oqaluttuaraa, annoraaq illernartuusoq aamma kikkunniluunniit assilineqarsinnaanngitsoq.
Tujuulussualiortartut suliffeqarfianni piginnittoq, Christopher Casuga angakkorsuup kinguaavinut maanna utoqqatserimalereerpoq tujuulussuullu tunisassiarineqarnera unitsereerlugu.
Atisanik ilusilersuisartup danskiusup, Peter Jensenip, Nunatsinni kalaallisuut kusagalugit ilaarlugit arnat kamippannik ilusilersuinera Nunatsinni aamma oqallisaaleraluarpoq ilaatigut ajorineqarluni. Tamannali eqqaassanngikkaanni taakku kamippaat kusagineqartupilussuupput.
