Inuit coronamut killilersuutit pillugit isumaat
Nuummi coronamut misissuisarfiup eqqaani inuppassuit ullumi tunuleriiaartut ornippagut, killilersuutit maanna atuuttut qanoq isumaqarfigineraat paasiniarlugu.
- 2 meterimut ungasissusissap atorneqannginnerujussua ersarittaqaaq, soorlu pisiniarfinni imerniartarfinnilu, 23-nik ukiulik Pamela Kristensen oqarpoq.
Assiliisoq: Karline Platou
Nuka Fleischer aamma taama isumaqarpoq:
- 2 meterimut ungasissusigineqaqqusaasoq malinneqanngitsoq takusarpara soorlu massakkut uani tunuleriiaaqqanitsinni malinneqanngilaq, oqarpoq.
Nangipporlu:
- Killilersuutit sakkortusinerisigut pinngitsoorneqarsinnaagaluarpoq aamma, Nuka Fleischer oqarpoq.
Assiliisoq: Karline Platou
Charlotte Kivioq isumaqarpoq misissuisarfiit amerlisariaqaraluartut:
Assiliisoq: Karline Platou
Misissuisarfiit immaqa amerligaluarpata ajunnginnerussagaluarpoq, soorlu Nuussuarmi Qinngutsinnilu misissuisarfileraanni pitsaassagaluarpoq, tassami ataasiinnaq kisiat piuppat tunuleriiaattorpassuit akornanni aamma tuniluussinnaavoq, aammalu misissuisarfiliarluta bussertarpugut inuit akornanniilluta, Charlotte Kivioq oqarpoq.
Assiliisoq: Karline Platou
Olivia Napattooq isumaqarpoq inuit killilersuutinut soqutiginnippallaarunnaarsimasut:
- Inuit malunnartarput ingammik pisiniarfinni imminut qanippallaannginnissamut maleruaqqussut soqutigivallaarneq ajoraat, inuiaqatigiit akisussaaffimmik tigusisariaqaraluarput naalakkersuisut qanoq oqarnissaat kisiat utaqqinagu, taanna oqarpoq.
