Inuit atugaat qinersinermi qitiutinneqarput

Canadami oktobarip ulluisa 14-ianni qinersisoqalerpat inuiaqatigiit Inuit ajornartorsiutitik ullormut oqaluuserisassanut ilaatinniarpaat. Inuit suleqatigiiffiat, Inuit Tapiriit Kanatami, Canadami partiit tallimat siulittaasuinut allakkanik nassitsisimapput, aqqaneq-marlunnik apeqqutitalinnik.
Allattoq Louise M. Kleemann
septembarip 15-at 2008 07:11

Suleqatigiiffiup Inuit Tapiriit Kanatami-p, paaserusuppaa Canadami naalakkersuisut siulittaasuata Canadami innuttaasunut ukioq manna juunip ulluisa aqqarnanni utoqqatsernerata kingunerissaneraa aningaasatigut ileqqaarnerup ineriartornera partiit eqqunniarneraat, atuarfiit pitsanngorsarneqassanersut peqqinnissaqarfiillu Inunnut ajunnginnerulissanersut.

Partiinut apeqqutiginiakkanut aamma ilaavoq nunap inuiisa inuttut pisinnaatitaaffii pillugit Naalagaaffiit Peqatigiit nalunaarutaat atsiorusunneraat, Inuktitullu oqaatsit Canadami Issittumi pisortatigoortumik atorneqassanersut. Aamma apeqqutigineqassaaq, Inuit Issittumi namminersortuunerat pillugu oqallinnermi Inuit ilanngunneqassanersut.

Canadami partiit kingusinnerpaamik oktobarip ulluisa aallaqqaataanni akereersimaqquneqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq