Inuit Ataqatigiit piumasaqarput Atassut akerliuvoq

Suliffeqarfiit aappaagumiit 35 procentimiit 30 procentimut akileraarutikkisaavigineqarunik, pinngitsooratik ilinniartunik sulinermut misiliisoqartarnissaat piumasaqaatigissallugu pissusissamisoorpoq. Aappaagu Aningaasanut Inatsisassaq Inatsisartuni ullumi siullermeerneqarmat Inuit Ataqatigiit taama piumasaqarput, piumasaqaataalli naalakkersuisooqataannit Atassummit tapersernartinneqanngilaq. Inuit Ataqatigiit Aningaasanut Inatsisissamut oqaaseqartitaat Johan Lund Olsen:

-Ukiorpassuanngortuni oqallisaajuarpoq ilinniartut sulinermik misiliiffissaaqijuarnerat. Taamaattumik tamanna illuatungeqartariaqarpoq, suliffeqarfiit oqilisaassiffigigutsigit taava piumaffigisinnaasariaqarpagut.

Inuit Ataqatigiit piumasaqaatertik pimoorunnerarpaat, taamaattorli isumaqatigiinniarnerni qeqqani aamma naapitsisinnaanerput.

- Apeqqutaalluinnarumaarpoq partiit Aningaasaqarnermut Ataatsimiititaliami ilaasortaatitaqartut. Johan Lund Olsen aamma oqarpoq piumasaqaat Naalakkersuisuni ajornartorsiutaalernavianngitsoq.

- Naaperiarneqarsinnaasarpugut, soorlu partiit allat uagut aamma naaperiartarivut.

Inuit Ataqatigiit piumasaannut Atassut isumaqataanngilaq. Atassutip oqaaseqartua Ellen Christoffersen:

-Atassummi aalajangiusimavarput inuussutissarsiornermi akileraarut, saniatigut piumasaaqatitalinngikkaluarlugu appartinneqassasoq.

Ellen Christoffersen isumaqarpoq Inuit Ataqatigiit piumasaqaataat Naalakkersuisooqatigiinnermut ajornartorsiortitsilernavianngitsoq.

Aappaagu Aningaasanut Inatsisassaq qaammat ataaseq aangiuppat aappassaaneerneqassaaq.