Inuit Ataqatigiit: Nunarsuarmi aningaasarsiornikkut ajornartorsiorneq misissorneqarli

Nunarsuaq tamakkerlugu aningaasaqarnikkut ajornartorsiornerup Nunatsinni aningaasarsiornermut qanoq kinguneqassanersoq Inuit Ataqatigiit naalakkersuisunut misissoqquaat.

Namminersornerullutik Oqartussat aningaasaqarnikkut tutsuiginassusiat innarlernaveersaarneqartariaqartoq, aningaasaqarnermut naalakkersuisoq, Per Berthelsen, oqarpoq.

- Ilisimasariaqarparput nunarsuarmi tamarmi ulluni makkunani annertoorujussuarmik ajornartorsiortoqarnera uagutsinnut qanoq sunniuteqarsinnaanersoq sillimaffigisariaqartullu suunersut, Kuupik Kleist oqarpoq.

Erniat qaffannissaat maanna malunnarsereermat, nalunannginnerarpaa aningaasanik attartorsimagaanni akilersuutit qaffakkumaarnerat.

- Avataaninngaannik aningaasalersuinissanik neriuuteqarneq naatsorsuuteqarnerlu qanoq siunissami sunnerneqassanersoq paasiniartariaqarpoq, sillimaffissallu piareersarfigalugit, nangippoq.

Aningaasanik siornatigut ajornanngitsumik taarsigassarsiffigineqarsinnaasut maanna tunuarsimaalersimapput, aningaasaliissutit utertinneqarsinnaanerat qularnarsimmat.

Aningaasanik atorniartarfinnit nunatta tutsuiginartutut isigineqaannarnissaa Aningaasanut naalakkersuisup Per Berthelsenip Siumumeersut pingaaruteqarsoraa.

- Tatiginartut ilisimaneqarnissarput pingaarnersaavoq. Taamaammat ALCOA-mik suleqateqarneq innarlernaveersaarlugu suliniuteqarpunga, neriuppungalu suleqataaffigineqassasoq. Naatsorsuutigisinnaavarput aningaasaleerusussuseq ukiuni tulliuttuni apparujussuassasoq aamaalu aningaasaleeqataanermut piumasaqaatit sukannernerulissasut. Tatiginassutsip innarlitsaaliornissaa aallaaviussaaq, Per Berthelsen erseqqissaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat