Inuit Ataqatigiit: Inatsisartut suliassiissutaat Naalakkersuisut suliarisimanngilaat
- Allamik oqarfiunngilaq tupinnarluinnarpoq taamatut pissutsit meeqqat inuunerissaarnissaannut tunngasut, aamma meeqqanut kinguaassiuutitigut atornerluisarnerit, pillugit inatsisartut marloriarlutik - siullermik ukiut sisamat matuma siorna - aalajangiussimasaat piviusunngorteqqullugit - Naalakkersuisut manna tikillugu piviusunngortissimanngimmassuk.
Naalakkersuisut uanga pasillermanngilakka uunga tunngasunut soqutigininngitsutut, isumaqarneruvunga aqutsiniarnikkut ajornartorsiuteqartoqartoq, aamma erseqqissaatigeqqittariaqartoq Naalakkersuisut pisussaaffigigaat Inatsisartuni amerlanerussuteqartut aalajangiigaangata taakku suliarissallugit
, taamaattumik isumaqarpunga aqutsiniarnikkut, aamma suliassanik tulleriiaariniarnikkut, ajornartorsiuteqartoqartoq.
Inatsisartuusugummi assigiinngitsutigut akisussaaffeqarpugut, kisianni Inatsisartut akisussaaffitsik naapertorlugu inatsisiliortoqassasoq marloriarlutik taama aalajangeereerput, aamma Inatsisartut ataatsimiititaliaat pisussaapput malinnaasussaallutik Naalakkersuisut
suliassaminnik suliarinninnersut, taamaattumik Inatsisartut pisussaaffitsik naapertorlugu suligaluarput, soorunalimi nakkutilliineq sakkortunerusinnaavoq sukumiinerusinaallunilu, Kuupik Kleist oqarpoq.
- Isumaqarpunga tukappallaartutut ingerlatsinermik takussutissaasoq, aamma pissutsit taama ilungersunartigisut qarsupiinnartumik pissusilersorfigineqarnerat isumaqarpunga akueriuminaatsorujussuusoq, Kuupik Kleist naggasiivoq.
