Aqqaluk Lynge Inuit Ataqatigiit - partii naammassisaqarusuttoq ukiunik 40-nngortorsiorpoq

- Inuit Ataqatigiit nunatsinnut politikkikkut sunniutai imaannaanngitsorujussuupput, tassami ukioq manna aamma ukiut 30-nngoratsigit nunatsinni parlamentarismep, tassa inatsisartut suleriaasiata eqqunneqarneraniit. Taakkuupput uagut aamma sulinitsinni sunniuteqarfigisimasagut. Inuit Ataqatigiit maani akuunerat aammalu partiinik allanik suleqateqartarsimaneq isumaqarpunga taakku tassaasut nukittoqutaasut, Inuit Ataqatigiinnik pilersitseqataasoq Aqqaluk Lynge taama oqarpoq.

Partiillu ukiut 40-t ingerlanermi naleqqussarsinnaasuseq nakuussutigisimagaa, Aqqaluk Lynge oqarpoq, eqqaasitsissutigalugulu nammineq siulittaasunngorami 30-nik taamani ukioqarluni, soorlu maanna siulittaasunngorusulluni sassartoq taama ukioqartoq:

- Nakuussuterput unaavoq inuusuttunut ullumikkullu inuunermut naleqqussarneq aamma politikkikkut oqariartuutini, tamannalu uanga isumaqarpunga nukittussutaasoq siunissami ingerlariaqqinnissamut.

Inuit Ataqatigiit naalakkersuisunut siulittaasuutitaqaqqilernissaannut periarfissat ima nalilerpai:

- Massakkut pissutsit taamaatsillugit allannguuteqartoqassanngippat tupigissavara. Isumaqarpunga siunissami qanittumi Inuit Ataqatigiit annertuumik aalajangiissuteqartumillu naalakkersuinikkut suleqataalerumaartoq, Inuit Ataqatigiinnik pilersitseqataasoq Aqqaluk Lynge taama oqarpoq.

Inuit Ataqatigiit Nuummi immikkut ittumik arfininngorpat decembarip aallaqqaataani ataatsimeersuassapput, nutaamillu tassani siulittaasortaassallutik.