Inuit Ataqatigiit ataatsimeersuarput - nutaamillu siulittaasortaassapput
Partii Inuit Ataqatigiit Maniitsumi ileqquusumik ataatsimeersuarpoq.
Sammisassat ikinngeqaat, nutaamillu siulittaasortaassapput, 1994-imiilli siulittaasuusimasoq Josef Tuusi Motzfeldt siulittaasutut tunuassammat.
Ataatsimeersuarneq ammarneqarmat Josef Motzfeldt minutsini 70-ini oqalugiarpoq, kattuffiullu nalunaarutaa saqqummiullugu.
"Nunatta pisuussutai - inuinut tamanut". Oqalugiaat taama qulequtaqarpoq, ataatsimeersuarnerlu aamma taama qulequtaqarpoq.
Inuiaqatigiinni atugarissaarneq oqimaaqatigiinnerusoq politikkikkut aallunniagassat pingaarnerit ilagigaat Josef Motzfeldtip oqariartuutigaa, uumassusilinnillu atuinermi piujuaannartitsinermik toqqammaveqarneq aamma pingaartuutippaa.
Pisortani inuiaqatigiillu ingerlatsiviutaanni ingerlatsineq torersoq, anersaakkut nukittuujuneq, nunanik allanik suleqataqarneq, pisussaaffiit tamatuma nassatai ilanngullugit oqalugiaammi aamma ilanngunneqarput.
Siulittaasussatut piukkunneqartut maannamut marluupput. Tassaapput inatsisartuni aamma folketingimi ilaasortaq Kuupik Kleist, kiisalu inatsisartuni ilaasortaq, siornatigullu naalakkersuisuusimasoq Asii Chemnitz Narup.
