Inuit arfineq marluk hashimik anngiortumik eqqussuisimanermut pineqaatissinneqartut

Unnerluutigineqartut arfineq marluk hashimik angiortumik eqqussuerujussuarsimasutut Sermersuup Eqqartuussiviani sisamanngornermi eqqartuussaapput. Unnerluutigineqartut tamarmik arfineq marluullutik pinerluuteqarnertik pillugu maanna pineqaatissinneqarsimasunut inissiisarfimmiittussanngortut, Kalaallit Nunaata Politiivi tusagassiutinut allapput.

Hashimik anngiortumik eqqussuinermi suliakkiisuusorineqartoq pineqaatissinneqarsimasunut inissiisarfimmiittussanngornermi saniatigut hashimik eqqussuinerminit 600.000 koruunit sinneqartut isertissimasai arsaarinnissutigineqarput.

Eqqartuussaasut katillugu hashimik 12 kiilumik Nunatsinnut poortukkanik nassiussillutik  Nunatsinnullu angalanerminni nassarlutik eqqussuisimapput.

Akitsuuserisut poortugaq hashimik 4 kiilumik imaqartoq nassaarimmassuk eqqartuunneqartut politiinit ilisimaneqalerput. Politiit misissuilerput, inuillu arfineq marluk hashimik anngiortumik 16-eriarlutik eqqussuisutut pineqatissinneqarlutik.

Arfineq marluk pineqaatissinneqarsimasunut inissiisarfimmiilersussatut sisamanngornermi pineqaatissinneqartut anngiortumik eqqussuisutut pillagaasussani kisimiinngillat. Taakkua saniatigut inuit tallimat aningaasanik ikinnerusunik unnerluutigineqartunut tunniussisimasutut akiligassinneqarput.

Eqqartuussinerup inernera politiit nuannaarutigaat:

- Suliami ilungersunartumi pisuutitsinerput eqqartuussiviup isumaqatigimmagu soorunami  iluarisimaarparput, politeeq suliami unnerluussisussaatitaasoq, Ulloriaq Grønvold oqarpoq.

Suliakkiisuuneragaasup  eqqartuussut Nunatta Eqqartuussisuuneqarfianu suliassanngortippaa.