Inuit aapakaallu ittui assigeequteqarput

Ilisimatuut paasisaasa kingulliit ilagaat, angutit suliffeqarfinni ittuusut naalagaassutsiminnik takutitsisarnerat aapakaaqatigiit ittuata naalagaassutsiminik takutitsisarneratorluinnarli iinnartartoq – aapakaarlu taamaattoq taaneqartarpoq – alpha-angutiviaq tassalu taakku aappaluttunik nulullit taama aviisi Politiken allaaserinnippoq.

Taama paasisaqarput Australiamiut ilisimatuui taakku misissuinerminni suliffeqarfinni sulisorpassuit suliffeqarfinnilu pisortarpassuit 100-likkaat apersortaqattaareerlugit taama paasisaminnik saqqummiisinnaasimapput.

Misissuinermi ilaatigut paasineqarpoq suliffeqarfiup ittui taama ittut oqartussaaffigisamik killingi malugitilluarumallugit illup iluani angalaaqattaartuartuusartut. Nipituumik oqaluttartut taamalu aamma allanut oqaluttunut qalliikulanermikkut oqartussaanerminnik malugititsiniaasarlutik.

Issiaviat allanit sulisunit anginerusarpoq – ullullu annersaa ataatsimiinnermut atortarpaa – suliffimminngaanniillu ajunngitsorsianik atorluaasarluni soorlu suliffeqarfiup mobiltelefonii suliffiullu biilii atorluartarlugit.

Aapakaallu alphat angutivissat nuluisa aappalunnerat suliffeqarfiit ittuinut muteerniusunut assingussuteqarportaaq tassami ittut muteernit tamakku taartunik atisaqarumasarput aappalluaarissumillu qilernerusertarlutik.

Ilisimatuut misissuinerminni suliffeqarfiup ningiui tassa arnat pisortat tapunneqarsimanngillat – tamannalu arnaalluni qujanartuuvoq.