Inuit 900-t missaat Katuami ippassaq tusarnaariarput
Haitimi nunap sajunneranit eqqugaasut ikiorniarlugit Katuami ippassaq tusarnaartitsinermi aningaasat ikinnerpaamik 200.000-it koruunit isertinneqarput, Kalaallillu Røde Korsiannut ingerlateqqinneqassapput.
Allattoq Mads Lynge
februaarip 13-at 2010 17:51
- Ataasinngorpat kisitseqqissaartoqassaaq, isertitallu qanoq amerlatiginersut paasiumaarparput, tusarnaartitsinermik aaqqissuisoq Ove Heilmann oqarpoq.
Billetsit 800-t tusarnaartitsinissaq tikillugu tunineqarput, tusarnaarialli katillugit 900-t pallissimassagaat tusarnaartitsinermik aaqqossuisoq oqarpoq.
Nipilersoqatigiit arfinillit akissarsiaqaatiginagu tusarnaartitsipput, isernermullu akiliutigineqartut nikisinneqaratik Kalaallit Røde Korsiannut ingerlateqqinneqassallutik.
Nipilersoqatigiit tusarnaartitsisut tassaapput Qarsoq, Aalut, Nina Kreutzmann Jørgensen, Zikaza, Kalak kiisalu Naneruaq.
Aningaasat Kalaallit Røde Korsiannut ataasinngorpat tunniunneqarumaarput.
