Inuit 60-ikkunni misileraatigineqarsimasut taarsiivigeqqusut

Naggueqativut inuusuttut pingasut Zeebedee Nungak, Eric Tagoona aamma Peter Ittinuar 1962-imi Canadap kujasinnerusortaanut atuariartortinneqarput. Ilaqutaat akuersiteqqaarnagit Ottawamut aallartitaapput, ukiunilu arlalinni ilaqutariinni qallunaani najugaqarput qallunaallu atuarfiiini atuartinneqarlutik.

Peter Ittinuarilli ATPN NewsDogimut oqarneratut, ilungersoraluarlutik atuarnerminni ingerlalluarsimapput.

Angutilli pineqartut pingasut ilisimanngisaminnik misileraatitut atorneqarsimanerat ilisimatusarfimmi Trent Universitymi ilisimatuup, David Kingip, allagaatinik pisoqqanik 1997-imi nassaarnermigut paasivaa.

Misileraanerup siunertaraa paasissallugu inuk allanngortinneqarsinnaanersoq - allatut oqaatigalugu - naggueqatigiinnit Inunneersoq qallunaanngortinneqarsinnaanersoq.

Misileraaneq iluatsinngilaq

Angutit pineqartut pingasut pitsaasumik ilinniagaqaraluartut misileraaffigineqarnerat iluatsinngilaq. Taakkumi inersimasunngoramik politikkikkut suliniuteqalerput, inuit pisinnaatitaaffii pillugit ilungersuuteqarlutik.

Peter Ittinuar naggueqatigiinni Inunni siullersaalluni Canadami inatsisartuni ilaasortanngorpoq.

2008-milu, ukiut qulingajaat matuma siorna, misileraatigineqarsimanerminnut Canadami naalakkersuisuinit taarsiivigineqarnissaminnik piumasaqaateqarput.

Maannamulli suli taarsiivigineqanngillat. Taamaammat premierministerimut Trudeauimut toqqaannartumik maanna saaffiginnipput.

Peter Ittinuarip oqarneratut "Isumaqatigiissuteqarniarta. Utoqqatserfigineqartariaqanngilagut, suliatsinnulli ilisimasaqarfiginngisatsinnut taarsiivigineqarnissarput piumasaraarput".

Angutit pingasut misileraatitut atorneqarsimanerat pillugu filmiliaq "The Experimental Inuit" 2009-mi saqqummersinneqarpoq.