Inuit 51-it ajunaareerput
USA-mi ukiorluusorujussuuvoq nunarujussuullu annersaa apummit qalligaasutullusooq ippoq, inuit ikinnerpaamik 51-t maannamut ajunaareerput.
Ajunaarnersuaqartillugu maleruagassat Oklahomami, Missourimi Californiamilu atuutsinneqarput.
Issinnerpaagami 17-inik ississimavoq, angerlarsimaffiit pisiniarfiillu 450.000-t missaanniittut innaallagiaarussimasut nutaarsiassaqartitsivik Associated Press ilisimatitsivoq.
Naalagaaffimmi Washingtonimi atuartut 380.000-t angerlarsimaannartariaqarsimapput, atuarfitik matoqqammata.
Texasip qiterpasissuani anorersuarnissaa nuna tamakkerlugu silasiorfiup aarlerisaarutigisimavaa, Californiami, Arizonami Texasimilu issittorujussuussangatinneqarpoq, New Yorkimiit Maine-p tungaanut sermernarujussuassangatinneqarluni taavalu USA-p qiterpasissuani tamarmi aamma qarsutsinersuaqarnissaa aarlerisaarutigineqarluni.
Californiap oqaluttuarisaanerani aatsaat taama silarlutsigaaq, tamaanilu guvernørip, Arnold Schwarzeneggerip, ilimasaarutigaa, naatitanik citrusinik naatitsisartut nioqquteqartartullu 1 milliardi dollarsit tungaanut annaasimassagaat.
