Inuit 300-t sinnerlugit toqutaareerput

Qinersinerup tungaanut præsidentiusoq Mwai Kibaki erseqqissaavoq, illuatungiliuttut siuttuannit Raila Odingamit taaguunneqarnerulaarnini pillugu præsidentissarsiornermi ajugaasuulluni.

Ilumulli Kibaki qinigaanerpaasimanersoq suli nalunaallivinngilaq. USA-p Tuluit Nunaata EU-llu qullersaqarfiinit kisitsinermi inernerit eqqoqqissaarnersut nalornissutigineqarpoq, ilimagaammi peqquserluttoqarsimanissaa.

Afrikami nunat suliniaqatigiiffianni siulittaasoq John Kufuor eqqissiviilliornerit unitsitsiniaqataaffiginiarlugit maanna Kenyamukarpoq.

Ikiuiniaqatigiiffiup Røde Korsip aamma nutaarsiassaqartitsivinnut nalunaarutigaa Kenyap kitaani qimaasut maanna 70.000-nngoreersut.

Danskit nammattagalisarlutik Kenyami takornariatut angalasut 13-nit eqqissiviilliorfimmiipput, ullumili illoqarfimmut umiarsualiveqarfimmut Mombasamut qimarnunneqarsinnaasimasut, Berlingske Tidende allaasserinnippoq.

Danskit qimaasariaqarsimasut ilaat marluk pisiniarfinni tillinniarnernik isiginnittuusimapput, namminnerlu aamma tillinniarfigineqarsimasut, Danmarkip Kenyami aallartitaa Bo Jensen Nairobimit oqaluttuarpoq.

Danmarkimi nunanut allanut ministereqarfik danskit Kenyamut aallarnissaanik nangaasaaripput.