Inuit 2238-t Nuummi ippassaq akiuussuserneqartut – naammanngitsorli Namminersorlutik Oqartussat oqarput
Inuit 2238-t Nuummi timersortarfimmi Inussivimmi covid-19-imut ippassaq sapaammi akiuussusersuisoqarnerani akiuussutisserneqarput.
Namminersorlutik Oqartussat akiuussusersuisoqarnermut ataqatigiissaarisuat, peqqinnissamut naalakkersuisuusimasoq, peqqissaasorlu, Anna Wangenheim akiuussusersuiffiup ippassaq matunerata kingorna naatsumik paasissutissiivoq:
- Inuit 2.000-t sinneqartut takkunnerat ilorrisimaarutigaarput, kisianni 3.000-t takkunnissaat soorunami neriuutigigaluarparput.
- 3.000-t missaanniittut takkunnissaat naatsorsuutigigaluarparput.
Inuit sisamanngormat akiuussuserneqanngitsoortut
Piumasut tamarmik atuarfimmi USK-imi akiuussuserneqarnissamut sisamanngormat nalunaaqutaq 14.00-miit 17.00-mut neqeroorfigineqarput.
Akiuussusersuinermulli ataqatigiisaarisut kapitikkiartortunut nalunaaqutaq suli tallimanngungitsoq angerlartitsisariaqarsimapput. Akiuussutissami nungussimapput.
Akiuussusersuinissamut matut suli ammarneqaqqianngitsut soqutiginnittorpassuit takkupput. Tamaanimi inuppassuit kapitikkiartorlutik tunuleriiaatilereerput.
AAMMA ATUARUK Arlaqartut kapitinngitsoorlutik angerlaannartut: Aaqqissuulluagaanngilaq
Tunuleriiaattullu ullup ingerlanerani amerliartuinnavipput. Allaat Hotel Hans Egede tikillugu tunuleriiaattoqarluni. Inuilli akunnerpassuarni tunuleriiaatereerlutik akiuussutissat nungussimasut nalunaarfigineqarput.
Inussivik piareerpoq. Assi: Peter Lyberth
Sisamanngormat akiuussutissat tamanut naammannginnerat pissutigalugu amerlasuut akiuussutisserneqaratik angerlaannartariaqarsimapput. Tamanna qanoq ilikkagaqarfigaasiuk?
- Pisariaqartitsineq annertusoq takuarput. Taamaammat Inussivimmi akiuussusersuisoqangaatsiarsnissaanut piffissap sivikitsup iluani, tassa sapaatimmut aaqqissuussivugut. Nammineq kajumissutsimik ikiuisorpassuaqarneratigut tamanna periarfissaqartinneqarpoq. Pisariaqartitsineq annertuvoq, Anna Wangenheim oqarpoq.
Sisamanngorpat akiuussusersuisoqangaatsiaqqissasoq
Illoqarfiit pingaarnersaanni tulliani sisamanngornermi, juulip ulluisa 29-anni akiuussusersuisoqangaatsiaqqissaaq. Pilersaarutit malillugit tamanna USK-ip eqaarsaartarfiani aaqqissuunneqartussaagaluarpoq, kisianni allanngussaaq:
- Inussivimmi akiuussusersuiinnarnissamut maanna pilersaarusiorpugut. Akiuussusersuisut neqeroorfigineqartullu qanoq amerlatiginissaat suli naluarput. Kisianni pilersaarutit annikitsortaat pilersaarusiorneqareerpata nalunaaruteqassaagut, Anna Wangenheim oqarpoq.
Nuummi inuit 3500-t siullermeertumik akiuussuserneqarsimanngillat. Taakkunannga 677-iinnaat ippassaq takkupput.
Sermitsiaq.ag naapertorlugu akiuussutissarpassuit asuliiginnarneqaratarnissaanut aarlerinartoqanngilaq. Akiuussutissaq Modernameersuusoq nillataartitsivimmiitinneqarsinnaavoq, piffissamilu kingusinnerusumi atorneqarluni.