Inuit 20-t peqqarniisaarniarnermik misissuinersuarmi tigusaasut

Inuit 20-it qaartiterutiliornissaminnut atortusisimammata aallaasinillu pissarsiniarsimagaluarmata Danmarkimi sumiiffinni arlalinni pingasunngormat pitoraannermi tigusarineqarput.

Tigusarineqartuni arlallit peqqarniisaarniartutut pasineqartut, politeeqarfinni pisortap, Jørgen Bergen Skovip, tusagassiortunut sassarami Danmarkimi pingasunngornermi ualisoq ilisimatitsissutigaa.

- Ujakkavut tamaasa tigusaraavut. Tigusaanngitsoortortaqanngillammi, politeeqarfinni pisortaq oqarpoq.

Politiit Danmarkimi sumiiffinni arlalinni pitoraannerminni najukkat 20-t missaat aamma misissoqqissaarpaat.

Islamisiortut sakkutuutut pissusilersortut peqqarniisaarniarnissaminnut piareersaaleruttortutut pasineqarmata pitoraapput.

Danmarkimi politeeqarfiit aqqaneq-marluusuni arfineq-marluk pingasunngornermi pitoraateqataapput. Pitoraannerit Københavnimi taamatuttaaq Københavnip kippasissortaani, Sjællandip qeqqani kippasissortaanilu, Fynimi, Jyllandip qeqqani kippasissortaanilu, Jyllandip kangisisortaani avannarpasissortaanilu pipput.

Peqqarniisaarniarnermik misissuineq nutaaq Danmarkimi aarlerinarluinnartumik peqqarniisaarniartoqaratarsinnaaneranik ilimasunnermik allannguinngitsoq, politiit isertortumik paasiniaasartuisa qullersaat, Flemming Drejer, oqaluttuarpoq.

- Tamanna Danmarkimi aarlerinarluinnartumik peqqarniisaarniartoqaratarsinnaaneranik ilimasunnermik allannguinngilaq, tusagassiortunut sassarnermini oqarpoq nangillunilu:

- Peqqarniisaarnianit qunusiarineqassanngilagut. Pisarnitsitut inuuinnassaagut.

Tigusaasut arlallit inatsit tunngaviusoq naapertorlugu sisamanngorpat killisiorneqarnissaat matoqqasumi pissasoq unnerluussisut piumasaraat.