Inuit 130-t imigassartornermik toqquteqartut
Nunatsinni innuttaasut 6.000-it tungaanoortut katsorsartinnissamik pisariaqartitsinerarlugit qimarnguinnit, peqqinnissamik suliaqartunit, politiinit, sulisitsisunit kommuniniillu paasissutissat tunngavigalugit taama naliliisoqarpoq.
Peqqissutsimut Naalakkersuisoqarfiup kisitsisaatai atornerluinermut siunissami katsorsaasarnissamut nuna tamakkerlugu pilersaarutissatut siunnersuummut atatillugu saqqummiunneqartut naapertorlugit, angutit pingasuugaangata ataaseq, arnallu sisamaagaangata aamma ataaseq, ajornartorsiutaasumik imigassartoriaaseqartartoq, Atuagagdliutini allaaserineqarpoq.
Atornerluisutut kingornuttakkat kipitinneqassapput
Ataatsimut isigalugu aningaasartuutit atornerluisunit pilersinneqartartut milliardip affaata tungaanoorput, taakkulu Nunatsinni tunisat ataatsimut nalingisa ilarparujussuisut naleqarput.
Isumaginninnermut naalakkersuisup Martha Lund Olsenip oqaatigaa, atornerluinermut katsorsaasarnerup pitsanngorsarnissaa inuiaqatigiinni susassaqartut tamarmik soqutigisariaqaraat aningaasaleeqataaffigalugulu.
- Atornerluisoqarnerata kinguneranik sumiginnaanerit, meeqqanik inissiinerit, siusinaartumik pensionisiaqalernerit, isumaginninnikkut aningaasartuutit, ilinniagaqanngitsoornerit suliffittaanngitsoornerillu, sulinngitsoortarnerit, nakuusertarneq, pinerluuteqartarneq ajutoornerillu inuiaqatigiinnut akisoorujussuupput, Martha Lund Olsen oqarpoq nangillunilu:
- Atornerluisutut inissisimasut ikilisinnerisigut inuiaqatigiit tamarmik iluaquserneqassapput aningaasanillu sipaartoqarluni. Pissarsiassaq ersarinnerpaaq unaavoq: Atornerluisutut kingornuttakkat kipitinneqassapput, amerlanerit ilinniagaqassallutik, amerlanerillu sulinissaminnut piareersimassallutik, ikinnerusut kinguaassiutimikkut atornerlunneqartassallutik sivisunerusumillu inuusoqartalerluni.
